Pryjšli pakarać muža, bo žonka napisała zajavu ab zhvałtavańni. A zabili susieda — kryvavaja razborka ŭ Juravičach
Unačy na 4 listapada ŭ ahraharadku Juravičy Kalinkavickaha rajona adbyłasia kryvavaja bojka. Kampanija maładzionaŭ u maskach źbiła haspadara adnaho z damoŭ, jaho žonku i susieda. Susied pamior u balnicy.
Śledčy kamitet pakul vyśviatlaje detali złačynstva. Całkam mahčyma, što dvum z troch napadnikaŭ budzie pahražać rasstreł. Jašče adzin ź niepaŭnaletnich, da jaho zakon budzie bolš humanny.
«Naša Niva» raspytała miascovych žycharoŭ pra abstaviny trahiedyi.
Da miascovaha žychara Alaksandra H. maładziony zavitali pozna nočču.
«Pryjšli ź siakieraj, z łomam. U maskach. Pačali hrukacca ŭ dźviery. Saša vyjšaŭ. Pačałasia bojka.
U hety momant susied, Siarhiej Kučar, vyjšaŭ na pierakur. Pačuŭ šum, pajšoŭ pahladzieć, što adbyvajecca. Kažuć, zastupiŭsia za Sašu… Nu i atrymaŭ taksama.
Mnie pazvaniła žonka Sašy, kaža, pryjdzicie, jon raźbity… Ja pryjšoŭ: syn lažyć la hanku, susied — kala doma. Abodva ŭ kryvi, chrypiać, hałovy raźbityja…», — raspavioŭ «Našaj Nivie» baćka paciarpiełaha Alaksandra.
Nieŭzabavie pryjechała chutkaja. Alaksandra i žonku Aksanu zabrali ŭ balnicu. Susied, Siarhiej Kučar, pamior ad traŭmaŭ. Jamu było 45 hadoŭ.
Alaksandar ciapier u reanimacyi. Žonku Aksanu taksama advieźli ŭ balnicu, ale špitalizavać nie stali.
Pryčyny kanfliktu baćka nie viedaje.
Viadoma, što napadnikaŭ było troje: Pavieł T., Ryhor Dz. i Vital K.
Baćka Paŭła T. taksama śćviardžaje, što nie viedaje pryčynaŭ napadu: «Heta staryja razborki ŭ ich. Ale syn nas u detali nie paśviačaŭ».
U zahinułaha Siarhieja Kučara zastałosia dvoje dziaciej i dvoje ŭnukaŭ. Jon pracavaŭ u Rasii, u toj trahičny viečar byŭ u matčynaj chacie ŭ Juravičach, a nastupnaj ranicaj musiŭ viartacca ŭ Rasiju na pracu, raspaviała «Našaj Nivie» jaho žonka Iryna.
«My baimsia za svaich dziaciej i žyćcio. Letam hetaja trojca chadziła pa dvarach pa vioscy i stralała sabak. My i čakali, što nieŭzabavie buduć stralać ludziej. Ryhora sudzili letam za toje, što sabak stralaŭ, ale chutka adpuścili.
Ciapier kažuć, što adzin z kampanii budzie ŭsio brać na siabie, kab astatnich adpuścili», — kažuć u miascovaj škole pra napadnikaŭ.
«Raniej ich dziadźki nas pužali, a ciapier hetyja», — kažuć viaskoŭcy i adznačajuć, što maładziony ŭžo pryciahvalisia da kryminalnaj adkaznaści.
Ale ŭ hetaj historyi nie ŭsio tak prosta. Miascovyja kažuć, što adzin z napadnikaŭ, Pavieł, niadaŭna zhvałtavaŭ žonku Alaksandra. Aksana napisała zajavu, a paśla razam z mužam pačała patrabavać hrošy z Paŭła — maŭlaŭ, tady zabiare zajavu (varta adznačyć, što ŭ takich spravach «zabrać zajavu» niemahčyma).
Maci Paŭła raskazvaje padobnuju historyju, jakuju, praŭda, viedaje sa słoŭ syna. Jana kaža, što Pavieł i paciarpieły Alaksandr niaredka vypivali razam.
«Niadaŭna Aksana sapraŭdy napisała na Paŭła zajavu ab zhvałtavańni. Ale tam ničoha nie było, heta jaje muž padhavaryŭ zrabić, chacieŭ «źniać» z majho syna hrošy. Paŭła zabirali ŭ milicyju, ale paśla adpuścili. Jon mnie raskazaŭ, što taja Aksana paśla pryznałasia milicyi, što nie było zhvałtavańnia i napisała papieru, što ŭsio było pa zhodzie», — tłumačyć maci Paŭła.
Što było paśla, jana nie viedaje. Ci pajšoŭ jaje syn adpomścić svajmu kryŭdzicielu? Naŭmysna chacieŭ zabić i Alaksandra, i jaho žonku, a paśla źbiehčy? Adkazaŭ u maci niama.
«Viedaju tolki, što kali adpuścili syna ź milicyi, to da jaho prychodzili niejkija ludzi ad taho Alaksandra. Syn kazaŭ, što chacieli zabić jaho, ale jon patłumačyŭ, što nikoha nie hvałtavaŭ», — kaža žančyna.
A ŭ toj viečar, kali adbyłosia źbićcio, Alaksandr z žonkaj zachodzili i da jaje ŭ hości.
«Jon prychodziŭ da nas z žonkaj. Byli pjanyja. Jon jašče bolš-mienš, jana zusim nijakaja. Prapanoŭvali, moža, ja chaču što-niebudź u ich kupić, pamianiać na harełku. Bieton, kazali jość, aluminij. Prasili choć pa 100 hramaŭ. Dała ja im litr samarobnaha vina, kab adčapilisia, nu i ŭsio. A paźniej, unačy, usio i zdaryłasia. Pryjšoŭ da ich Pavieł ź siabrami…»
Ciapier usie troje napadnikaŭ pad vartaj. Dakładnyja matyvy i abstaviny zdareńnia vyśviatlajuć śledčyja.
Ciapier čytajuć
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach88
Kamientary