Biełaruskija demakratyčnyja siły vystupili z supolnaj zajavaj u adkaz na kampaniju ŭ sacyjalnych sietkach suprać telekanała Biełsat, jakaja razharnułasia ŭ apošnija dni.
Sustaršynia BCHD Vital Rymašeŭski adznačyŭ: «Biełsat źjaŭlajecca adzinym niezaležnym biełaruskim televizijnym kanałam. Za apošni hod ataki pa tych ci inšych padstavach padvierhlisia praktyčna ŭsie niezaležnyja biełaruskija ŚMI. Jak praviła, nahody byli vykarystanyja roznyja, ale ŭ vyniku kožnaj z redakcyj byŭ naniesieny surjozny ŭron. I ciapier nahoda dla napadak na Biełsat absalutna nie adekvatnaja toj kampanii pa dyskredytacyi, jakaja razharnułasia suprać kanała i jaho kiraŭnictva. Zaklikaju ŭsie niezaležnyja palityčnyja struktury i hramadskija arhanizacyi Biełarusi, usich nieabyjakavych hramadzian krainy padtrymać Biełsat i abaranić jaho ad napadak».
Zajava salidarnaści z telekanałam «Biełsat»
Za 10 hadoŭ, jakija minuli z momantu stvareńnia telekanała, Biełsat sfarmavaŭ stałaje koła hledačoŭ i prychilnikaŭ. Aŭdytoryja kanała niaźmienna pašyrajecca — i jon zastajecca adzinaj niezaležnaj krynicaj infarmacyi (aktualnych navinaŭ Biełarusi i śvietu, jakasnaj analityki, histaryčnych i kulturnickich prahramaŭ) u televizijnym farmacie.
Praca adbyvajecca na fonie niaspynnych represijaŭ suprać žurnalistaŭ kanała — štrafy, abmiežavańnie vyjezdu i navat svabody, rehularnyja admovy ŭ akredytacyi ŭ Biełarusi, biespadstaŭnyja abvinavačvańni i zatrymańni.
Adsutnaść mahčymaści lehalnaj pracy ŭ Biełarusi i kamiercyjnaha składniku rehularna stavić Biełsat pad pahrozu isnavańnia.
Za apošni hod ułady Biełarusi aktyvizavali cisk na niedziaržaŭnyja biełaruskija ŚMI. Abmiežavany dostup da sajtaŭ «Biełpartyzan» i «Chartyja'97», ataka na žurnalistaŭ infarmacyjnaj ahiencyi BiełaPAN i partału TUT.by.
Ale asabliva časta i rehularna apošnim časam mienavita Biełsat stanovicca abjektam dyskredytacyjnych kampanij i pravakacyj z boku aficyjnych biełaruskich i rasiejskich miedyjaŭ.
Va ŭmovach uzmacnieńnia cisku na Biełaruś z boku Rasiei, u tym liku i na infarmacyjnym poli, Biełsat zastajecca adzinaj televizijnaj krynicaj niezaležnaj infarmacyi dy ŭzmacnieńnia biełaruskaj tojesnaści.
U hetaj situacyi my zastajemsia ŭdziačnymi hramadzianskaj supolnaści, hramadzianam i palitykam Polšy za spryjańnie ŭ stvareńni prajekta, jaki paśladoŭna padtrymlivajecca, niezaležna ad palityčnych źmienaŭ.
Značeńnie i ŭpłyŭ Biełsatu na pavyšeńnia ŭzroŭniu śviadomaści i demakratyzacyi biełaruskaha hramadstva ciažka pieraacanić.
Biełsat Žyvi!»
Zvarot padpisali Mikałaj Kazłoŭ (Abjadnanaja hramadzianskaja partyja), Vital Rymašeŭski (Biełaruskaja Chryścijanskaja Demakratyja), Juryj Hubarevič (Ruch «Za Svabodu»), Hienadź Fiadynič, prafsajuz REP.
Ciapier čytajuć
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ28
Kamientary