Rasijski ekanamičny partał «Prajm», jaki naležyć dziaržaŭnamu ahienctvu «Rośsija Siehodnia», apublikavaŭ spravazdaču analitykaŭ Sberbank Investment Research, u jakoj śpiecyjalisty prahnazujuć, jak na biełaruskuju ekanomiku paŭpłyvaje rasijski padatkovy manieŭr.
Fota: Wikimedia Commons.
Na dumku analitykaŭ, u 2019 hodzie Biełaruś vydatkuje na rasijskuju naftu na 300 miljonaŭ dalaraŭ bolš, čym u 2018 hodzie (pry ŭmovie, što nafta Brent budzie kaštavać $73 za baral). Taksama skarociacca prybytki biudžetu ad ekspartnych pošlin — na $0,3 miljarda da $1,7 miljarda. A biudžetny praficyt u hetym vypadku składzie 1,0% VUP. Kali nafta patańnieje da $65, to jak impart, tak i ekspartnyja pošliny skarociacca na $0,5 miljarda, a praficyt biudžetu pamienšycca da 0,7% VUP.
Analityki ličać, što padatkovyja źmieny ŭ Rasii pryviaduć da pavyšeńnia koštu rasijskaj nafty, jakaja pastaŭlajecca ŭ Biełaruś, z $399 za tonu ŭ 2018 hodzie da $416 u 2019 pry košcie Brent na ŭzroŭni $73. Pastupleńni ŭ biudžet Biełarusi ad ekspartnych pošlin (u tym liku ad reekspartu) skarociacca z $2,0 miljarda ŭ 2018 hodzie da $1,7 miljarda u 2019 pry siarednim košcie Brent $73 abo da $1,5 miljarda pry košcie Brent $65.
Źnižeńnie ekspartnych pošlin na naftu ŭ Rasii pryviadzie da skaračeńnia dachodaŭ ad reekspartu rasijskaj nafty, miarkujuć analityki Sberbank Investment Research. Padaražańnie impartu nafty na fonie hłabalnaha źnižeńnia naftavych koštaŭ budzie sadziejničać pavieličeńniu deficytu rachunku apieracyj Biełarusi. Pry canie Brent $65 jon pavialičycca z $1,5 miljarda ŭ 2018 hodzie da $2,0 miljarda ŭ 2019, miarkujuć śpiecyjalisty Sberbank Investment Research.
Kamientary