Saŭładalnica cukierni «Žorny» i stvaralnica brenda «Ježa adzinarohaŭ»: Biełarusy musiać viedać, što rabić u seks-šopie
Siońnia ŭ našuju rubryku «Piać rečaŭ» my zaprasili Zoju Pryšyvałku — kandytarku, saŭładalnicu piakarni i cukierni «ŽORNY» i stvaralnicu brenda «Ježa adzinarohaŭ».
Zoja i vypiakańnie
Hieohraf u minułym, viazalnica pad zamovu, mama dźviuch dačok Zoja razam z mužam Alaksandram šeść hadoŭ tamu pačała vypiakać chleb i desiert mazurku pa tradycyjnych biełaruskich receptach, potym adnavili recept jabłyčnaha syru. Ciapier sama Zoja stvaraje roznyja słodyčy: raśpisnyja pierniki, maršmełaŭ, salonuju karamiel, limonny kurd.
«Mnie padabajecca «słoŭ-fud tematyka» [ruch, jaki supraćstaić sistemie chutkaha charčavańnia — «NN»]. Muž napisaŭ knihu pra chleb, stvaryŭ słoŭnik pa kuchonnaj biełaruskaj terminałohii, a ja nie suprać samaho pracesu hatavańnia. Byŭ momant, kali my stamilisia i spynilisia ŭ hetaj śfiery, ale ciapier ja baču, što nichto nie zajmajecca tradycyjnymi receptami, nichto ich nie padymaje. Tamu chaču viarnucca ŭ hetuju temu. Recepty karystajucca papularnaściu dahetul — mazurku pa recepcie 1848 hoda raskuplajuć vielmi chutka».
Zoja i seks
Akramia asnoŭnaj pracy, Zoja aktyŭna zajmajecca seksualnaj aśvietaj u svaim błohu.
«Na žal, u nas niama seksualnaj adukacyi ni ŭ škole, ni va ŭniviersitetach. My ŭsie vučymsia hetaj temie, u najlepšym vypadku, u razmovach sa svaimi baćkami, u inšym vypadku — u razmovach ź siabrami, tyrkajučysia, jak ślapyja kacianiaty. Tema tabujavanaja, usio z prystaŭkaj seks- traplaje na terytoryju demanizacyi, ale seks — nieadjemnaja častka našaha žyćcia. Heta karysna dla zdaroŭja, nu i heta samy biaskryŭdny sposab dastavić sabie zadavalnieńnie. Ja mama, mnie treba adukoŭvać i svaich dziaciej u hetym płanie. A heta vielmi ciažka, tamu što narmalnych krynic niama, śpiecyjalistaŭ pa hetaj temie vielmi mała. Časta ludzi nie viedajuć i svajoj anatomii. Maja zadača zaklučajecca ŭ tym, kab znajści takich śpiecyjalistaŭ. Biełarusy musiać viedać, jak schadzić u seks-šop, što tam nabyć, jak hetym usim potym karystacca».
Zoja i cieła
«Nie viedaju čamu, ale słova «toŭsty» vybivajecca z usich charaktarystyk čałavieka, bo ŭsprymajucca narmalna «chudy», «nizki», «vysoki», «pryhožy», «niepryhožy», ale «toŭsty» — užo klajmo. Napeŭna, mnie na hetym etapie žyćcia dadziena być toŭstaj, kab u mianie raskrylisia vočy i ja ŭbačyła, jak takich ludziej vykreślivajuć z žyćcia. Prychodziš da doktara, i tabie na luboje pytańnie kažuć: «Pachudziejcie». Pra heta ja taksama pišu ŭ błoh. Ja nie šukaju niejkaj materyjalnaj vyhady, ale kamu, jak nie mnie, raskazvać pra niejkija prablemy cieła, čałavieku, jaki ŭvieś čas z hetym sutykajecca. Kali čytać ludziej plus-sajz za miažoj, jany vielmi adkryta pišuć pra hetuju temu, a ŭ nas pakul usio znachodzicca ŭ zarodkavym stanie. I vielmi radasna bačyć, jak usio pakrysie źmianiajecca. Jak dyzajniery raniej nie chacieli šyć na ciabie na tym ža fešn-markiecie, a ciapier zhadžajucca. A voś u rekłamu spa-sałona mianie pakul nie voźmuć, chacia maja skura ŭ dobrym stanie. Nichto nie kaža: «Zoja, davaj my zdymiem ciabie ŭ rekłamie». Tamu što my ŭsie zvyklisia dumać adnym šabłonam i bačyć u rekłamie chudych madelaŭ.
Usie maje 5 rečaŭ źviazanyja z dohladam siabie. Dahladajcie siabie, słuchajcie siabie, kłapaciciesia pra siabie.
Sukienka JAMIDO
Kali ja stała poŭnaj, mnie pierachaciełasia być dziaŭčynaj u džynsach, doma niama ni adnych nahavic. Vostra stajała prablema, jak letam nasić sukienki, bo ŭvieś čas cierlisia nohi, potym Emi Šumier, amierykanski komik pamieru plus-sajz, raskazała, što karystajecca śpidstykam, ja dva hady tamu pravieryła hety mietad — i ciapier nie vyłažu z sukienak.
Upryhožańnie «HłasTrank»
Heta ŭvohule ŭnikalnaja reč. Takoje ŭpryhožańnie možna pa spadčynie pieradavać, heta redkaja technika Cifani. Ja vielmi rada, što asabista paznajomiłasia ź ich stvaralnicaj Kaciaj. Doma ŭ mianie šmat roznych brendaŭ, ale hety vielmi aŭtentyčny.
Žadańnie być pryhožaj u mianie źjaviłasia tolki paru hadoŭ tamu, mabyć, tamu što ja narešcie zrazumieła, što ja poŭnaja. Ja pierastała z hetym zmahacca i rassłabiłasia.
Akulary
Raniej ja dumała, što nie budu akularykam, ale hod tamu zrazumieła, što ŭ mianie balić hałava. Ja vyrašyła pravieryć zrok, i doktar ździviłasia, jak ja žyvu, bo vyśvietliłasia, što adno voka naohuł admaŭlałasia bačyć. Ciapier ja akulary lublu, heta dla mianie dadatkovy aksiesuar. Doma ŭ mianie niekalki apraŭ. Kali nadzieła ich upieršyniu, zapytałasia ŭ muža: «Saša, heta ŭ nas taki Minsk pryhožy?»
Kniha Filipa Hłasa «Słovy biez muzyki»
Ja vielmi lublu čytać. Hetuju knihu muž zamoviŭ na dzień narodzinaŭ. Heta aŭtabijahrafija amierykanskaha muzyki, jaki piša sučasnuju muzyku. Jana nastolki zachaplalnaja, nastolki cikavaja, hienijalnaja! Pakazvaje, što čałavieku, kab niečaha dasiahuć, nie abaviazkova mieć talent i iskru božuju, a treba šmat pracavać nad saboj.
Sacisfajer (vakuumny stymulatar klitara)
Revalucyju ŭ seks-cackach daŭno zrabiŭ «Vumanajzier», dobryja idei adtul vykarystali ciapier u sučasnym sacisfajery.
Cacka, jakuju možna vykarystoŭvać pierad, padčas, paśla i zamiest seksu. Jana dapamahaje razradzicca ŭ luboj situacyi, jana erhanamičnaja. Ja razrekłamavała i «pradała» hetuju cacku čatyrom siabram jašče da taho, jak kupiła sabie.
Jana akazvaje vakuumnaje ŭździejańnie na klitar. Kali žančyna nie ŭzbudžanaja, jana ŭzbudžajecca. Jaje možna vykarystoŭvać u vańnie i pad dušam, a taksama ź joj čaściej zdarajecca skvirt. Usim rekamienduju.
Kamientary