Turysty miesiac nie mohuć patrapić na jaŭrejskija mohiłki ŭ Hrodnie. Horad zvolniŭ achoŭnikaŭ i pastaviŭ zamok
Užo miesiac turysty nie mohuć patrapić na jaŭrejskija mohiłki ŭ Hrodnie. U pačatku lipienia horad skasavaŭ damovu ź siamjoj, jakaja žyvie la mohiłak i jakaja šmat hadoŭ adkryvała bramu pryjezdžym. Kamunalnyja słužby pamianiali zamok, a znajści kluč zvyčajnym turystam prosta nierealna, piša Hrodna.life.
Pahladzieć mohiłki ŭ Hrodnie jeduć pieravažna ludzi z dalokich krain, čyje svajaki tut pachavanyja. Pryjazdžajuć siudy metanakiravana i turystyčnyja hrupy z Anhlii, ZŠA i Izraila — pamalicca na mahiłach praviednikaŭ.
Siońnia, u pik turystyčnaha siezonu, ludzi, jakija pryjechali pahladzieć staryja mohiłki, stanoviacca zakładnikami zvyčajnaj haradskoj situacyi. Nichto ŭ vychodny dzień nie moža pryvieźci turystam klučy ad mohiłak, dy i daviedacca, u kaho jany znachodziacca, zamiežniki taksama nie mohuć. La bramy niama nijakaj infarmacyi.
U sinahozie zasmučanyja situacyjaj i adznačajuć, što nie ŭsie turysty naohuł mohuć zrazumieć, čamu nie mohuć patrapić na mohiłki.
«Usio žyćcio my nakiroŭvali turystaŭ da hetaj siamji, jakaja adkryvała mohiłki i pakazvała patrebnuju mahiłu. Jany tam i prybirali. A zaraz usio — pačalisia prablemy, — raspaviadaje staršynia iŭdziejskaj abščyny Hrodna Barys Kviatkoŭski. — Voś niadaŭna pryjechaŭ čałaviek pahladzieć pachavańni - nie atrymałasia. Ja jamu skazaŭ, kab jon telefanavaŭ u harvykankam i damahaŭsia, kab jamu adčynili bramu. A nasamreč źviartacca prosta niama da kaho: na varotach tam ni adrasa, ni telefona».
Načalnik učastka SAHa Viktar Čumičaŭ, jaki adkazvaje za mohiłki, raspavioŭ, čamu ź siamjoj nie praciahnuli supracoŭnictva i jak być dalej turystam.
«Tak, siamja raniej pracavała na mohiłkach dvornikami, ale ich skaracili. U horada niama hrošaj na ich utrymańnie. Ciapier mohiłki prybiraje raz u miesiac śpiecyjalnaja bryhada. Pakidać ich adkrytymi my nie možam z-za vandałaŭ i tamu paviesili svoj zamak. Ale chto zachoča tudy patrapić, toj i praz płot pieralezie. Jak być z turystami, my pakul nie viedajem. Budziem vyrašać hetaje pytańnie. Mahčyma, zaviaziem kluč u sinahohu».
Barys Kviatkoŭski kaža: kab vyrašyć situacyju z mohiłkami, treba ŭsio viarnuć, jak było. Tym časam jamu ŭ sinahohu ŭžo paśpieli pryvieźci kluč. Ale asabista jon na mohiłki nikoha vazić nie budzie.
«A mnie navošta kluč? Ja nie razumieju. Siamja tam žyvie i realna na praciahu doŭhaha času dahladała mohiłki. My im daviarali. Jany pracavali na paŭstaŭki i horad płaciŭ im usiaho 250 rubloŭ. Heta što, takija vialikija hrošy? Dziakujučy hetym ludziam my siońnia možam pryvodzić mohiłki ŭ prykład usim u Pryniomanskim krai. Na mohiłkach pachavanyja viadomyja jaŭrei, cadyki [praviedniki - red.] i na ich mahiły źjazdžajucca ludzi z usiaho śvietu. Treba vyrašać pytańnie z mohiłkami».
Ciapier čytajuć
Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa55
Kamientary