4 sakavika ŭ minskim restaranie-pivavarni «Druźja» adbudziecca vialiki viesnavy kancert hurta «Krama» z priezientacyjaj novaha DVD-alboma «Krama — 25 hadoŭ». Heta zdymki kancerta, što adbyŭsia ŭ Minsku 12 listapada 2016-ha hoda ŭ «Prime Hall» i byŭ pryśviečany 25-hadovamu jubileju hrupy. «Krama» jašče ŭ 1994-m hodzie była pieramožcaj samaj pieršaj «Rok-karanacyi», i praciahvaje słavić biełaruski bluz praz čverćstahodździa. Jubilejnaja prahrama składałasia sa słavutych chitoŭ, u tym liku prahučała niamała piesień, jakija kalektyŭ užo nie vykonvaje na svaich šarahovych kancertach — «Stary sabaka», «Doŭhija nohi», «Im nie treba tvoj bluz», «Čakaj» u novych aranžyroŭkach.
4-ha sakavika, akramia prezientacyi kancertnaha DVD, adbudziecca premjera novaj viersii pieśni na vierš Michała Aniempadystava. Ihar Varaškievič z muzykantami vyrašyli dać druhoje žyćcio daŭniaj kampazicyi hurta «Bonda» «Da nieba» (1986) z tekstam Aniempadystava i pieršaje vykanańnie 4 sakavika pryśviacić pamiaci paeta i mastaka.
Ihar Varaškievič uspaminaje historyju pieśni: «U hrupie «Bonda» asnoŭnym paetam byŭ barabanščyk Siarhiej Knyš. Adnak akramia jaho teksty pisali — ci sprabavali pisać — i inšyja. Fieliks Aksioncaŭ, naprykład, jaki potym ažyćciaviŭ svaje zadumy z hurtom «Ulis», Fiedzia Kaškurevič napisaŭ na adnu pieśniu tekst. I Michał Aniempadystaŭ taksama napisaŭ tekst. I było heta, nakolki ja pamiataju, u 1986-m hodzie. Siarhiej Knyš pajšoŭ u armiju, jon adsutničaŭ dva hady. A ź Michałam my paznajomilisia, dumaju, praź Siarhieja Kraŭčanku, jany siabravali. Samu pieśniu, muzyku my napisali, kali byli na studenckaj «chałtury» ŭ Nižniavartaŭsku. Bo amal usie vučylisia ŭ teatralna-mastackim instytucie. Ja dakładna pamiataju, jak ja navat prosta biez hitary chadziŭ pa vulicach i napiavaŭ hetuju miełodyju. A jak viarnulisia dadomu, Michał i napisaŭ tekst, jaki nam padyšoŭ. Atrymałasia pieśnia «Da nieba».
Potym, kali ŭžo była «Krama», ja nieadnarazova prapanoŭvaŭ Michału napisać nam jaki tekst, ale jon uvieś čas niejak tak vietliva znachodziŭ pryčyny dla admovy. To ŭ jaho niejkaja inšaja terminovaja sprava, to natchnieńnie nie pryjšło. Ale nijakaj kryŭdy ŭ mianie, naturalna, nie było, i tym bolš — niama zaraz. Prosta tady jaho idei, mahčyma, bolš supadali ź inšymi muzykami. Naprykład, z Kasiaj Kamockaj. Heta ja tolki niadaŭna zrazumieŭ, zadumaŭsia ŭžo paśla śmierci Michała — što z Kasiaj Kamockaj jon uvasobiŭ u žyćcio svaju luboŭ da polskaj hrupy «Maanam». Ja, darečy, hety kalektyŭ lubiŭ nie mienš za Michała. Ale z-za taho, što ja chłopčyk, moj vobraz nie padychodziŭ. A voś u Kasi Kamockaj jon niešta takoje ŭbačyŭ, adčuŭ. Tamu i atrymałasia tak mnoha vydatnych piesień.
Svoj viesnavy kancert na pačatku sakavika my pačali płanavać jašče vosieńniu, užo była data. A paśla trahičnaha sychodu Michała źjaviłasia ideja adradzić pieśniu, dać joj novaje žyćcio. I tak atrymlivajecca, što mienavita 4-ha sakavika budzie 40 dzion z dnia śmierci Michała Aniempadystava. I jaho pamiaci my pryśviacim hetuju kampazicyju — «Da nieba».
U najbližejšy čas «Krama» płanuje viarnucca ŭ studyju hukazapisu i nieŭzabavie vydać maksi-sinhł z troch piesień, jaki stanie pieršaj łastaŭkaj budučaha novaha alboma. (Apošniaja pa časie płaścinka «Biełaja vada» vychodziła ŭ 2014-m hodzie.) U novy maksi-sinhł uvojduć kavier na pieśniu «Bondy» «Da nieba», studyjny zapis novaj pieśni «Stefka praz 30 hod» («Stefka-3»), jakaja dahetul mieła tolki kancertnuju viersiju, i absalutna novaja kampazicyja na vierš daŭniaha kalehi «Kramy» pa napisańni piesień Źmiciera Łukašuka. Akramia taho, u płanach zdymki klipa na pieśniu «Stefka praz 30 hod», jaki taksama ŭvojdzie ŭ maksi-sinhł.
Miž inšym, pieśni «Kramy» padabajucca nie tolki biełarusam. Jany pryjšlisia daspadoby i kitajskim amataram muzyki. Pra heta pakłapaciŭsia hitaryst ź pieršaha, załatoha składu «Kramy» Ilja Šeŭčyk, jaki 15 hadoŭ paśpiachova pracuje ŭ Kitai i staŭ tam pryznanym muzykam. Jon časta vystupaje na telebačańni, supracoŭničaje ź miascovymi artystami. Na pačatku hetaha hoda Ilja z kitajskimi kalehami pierakłali na kitajskuju movu i zapisali adzin z najvialikšych chitoŭ «Kramy» «Vypi sa mnoj da dna». Akramia taho, hety bluz na kitajskaj movie Ilja Šeŭčyk časta vykonvaje na kancertach i śviedčyć, što kitajcam padabajecca miełodyka «Kramy». Jość płany pierakłaści i zapisać jašče nie adnu pieśniu našaha biełaruskaha hurta i, mahčyma, navat vydać paŭnavartasny albom. Kali prychilnikaŭ «Kramy» ŭ Kitai stanie mnoha, Ilja maryć arhanizavać dla rodnaj biełaruskaj hrupy kitajski hastrolny tur.
Sustrakajcie viasnu razam z hurtom «Krama»!
4 sakavika «Krama» zaprašaje ŭsich prychilnikaŭ na prezientacyju kancertnaha DVD sa svajho 25-hodździa ŭ restaracyju «Druźja» (Kulman, 40).
Vas čakajuć: najlepšy biełaruski rok, dobraje piva i vydatny nastroj!
Pačatak a 20-j.
Kvitki ŭžo ŭ prodažy.
Ciapier čytajuć
Jak siońnia žyvuć Kuźniečyki, jakija amal dva hady chavalisia ŭ pasolstvie Šviecyi, kab nie trapić u kipciury siłavikoŭ?1
Kamientary