Uładzimir Jahoraŭ, aktyvist partyi «Jabłoko» ź Ćviarskoj vobłaści, ekstradavany na radzimu ź Minska paśla sprobaŭ paźbiehnuć pieraśledu rasijskich uładaŭ va Ukrainie i Biełarusi, paviedamlaje VVS.
Biełaruskaja častka pryhodaŭ Jahorava, abvinavačanaha ŭ ekstremiźmie za zapis u sacyjalnaj sietcy «UKantakcie», padobnaja da schiemy, adpracavanaj biełaruskimi siłavikami pry vydačy ŭ Čačniu spartsmiena Murada Amryjeva.
U pačatku červienia Jahoraŭ sprabavaŭ atrymać status biežanca na terytoryi Ukrainy, ale nieviadomyja hvałtoŭna supravadzili rasijanina da pamiežnaha punkta, jaki pryniata nazyvać «Try siastry», paviedamiŭšy, što ŭjezd va Ukrainu jamu zabaronieny.
Pravaabaroncy z arhanizacyi Human Constanta Janie Hančarovaj Jahoraŭ kazaŭ, što heta, pa jaho infarmacyi, byli supracoŭniki Słužby biaśpieki Ukrainy. Ukrainskija pamiežniki taksama paviedamili aktyvistu, što ŭjezd va Ukrainu zakryty dla jaho na try hady.
Ukrainskaje telebačańnie «Hromadśkie» źviarnułasia z zapytam u SBU i apublikavała adkaz viedamstva. U liście za podpisam vykonvajučaha abaviazki načalnika upraŭleńnia SBU ŭ Čarnihaŭskaj vobłaści. P. Siańko skazana, što SBU nie prymała rašeńniaŭ ab vydvareńni Jahorava i zabaronie na ŭjezd va Ukrainu.
Spynieny na ŭkrainskaj miažy Jahoraŭ adpraviŭsia ŭ Minsk, dzie, pa słovach pravaabaroncaŭ, adpraviŭ va ŭkrainskaje upraŭleńnie Viarchoŭnaha kamisara AAN pa spravach biežancaŭ prośbu razabracca ŭ jaho situacyi.
U Biełarusi Jahoraŭ čakaŭ viestak z Ukrainy na praciahu dvuch-troch tydniaŭ, načujučy to ŭ chostele, to ŭ svajoj mašynie.
28 lipienia Jahoraŭ paviedamiŭ pravaabaroncy Hančarovaj, jakaja trymała ź im suviaź, što ŭ Rasii jon abjaŭleny ŭ vyšuk, a na nastupny dzień pierastaŭ adkazvać na zvanki.
Pravaabaroncy vyjavili la minskaha chosteła aŭtamabil Jahorava. Supracoŭnica chosteła skazała, što rasijanina zabrali ludzi z KDB.
Na praciahu nastupnych dzion pravaabaroncy i žurnalisty niekalkich biełaruskich ŚMI sprabavali vyśvietlić los źnikłaha aktyvista «Jabłoka».
Aficyjnyja asoby z KDB, MUS, adździeła pa hramadzianstvie i mihracyi adkazvali redakcyjam i pravaabaroncam, što nie majuć pra jaho źviestak.
31 lipienia vyjaviŭsia śled: u sudzie Kastryčnickaha rajona biełaruskaj stalicy Jahorava pavinny byli sudzić pa abvinavačvańni ŭ drobnym chulihanstvie. Ale žurnalistam i pravaabaroncam, jakija prybyli ŭ sud, paviedamili, što słuchańni pieraniesienyja, i admovilisia skazać, na jaki dzień i hadzinu.
Ranicaj 1 žniŭnia biełaruskaja pravaabaronca Nasta Łojka vyśvietliła ŭ sudździ, što praces užo adbyŭsia — viečaram 31 lipienia. Jahorava asudzili zavočna, u jaho adsutnaść, pakarali dvuma sutkami administracyjnaha aryštu i pastanavili, što hetyja dvoje sutak jon užo adbyŭ.
Pravaabaroncy i žurnalisty znoŭ pačali šukać rasijanina, i znoŭ dziaržsłužačyja siłavych viedamstvaŭ zajaŭlali, što Jahorava niama — ni ŭ słužbovych kabinietach, ni ŭ viedamasnych izalatarach.
U sieradu ranicaj ad rasijskaha advakata Jahorava Śviatłany Sidorkinaj pryjšło paviedamleńnie ab tym, što aktyvist «Jabłyka» dastaŭleny ŭ rodnuju Ćviarskuju vobłaść.
Pa słovach advakata, viečaram 1 žniŭnia joj paviedamili, što Jahoraŭ znachodzicca ŭ IČU horada Tarapca.
Aktyvist partyi «Jabłoko» Uładzimir Jahoraŭ viadomy jak zmahar z karupcyjaj. U Tarapcy dom Jahorava niekalki razoŭ padviarhaŭsia napadu nieviadomych — bili vokny, padpalvali bramu.
Jon byŭ abvinavačany ŭ ekstremiźmie za adzin z zapisaŭ u sacyjalnaj sietcy «UKantakcie». U zapisu, jak Jahoraŭ raniej raspaviadaŭ žurnalistam, jon niepachvalna vykazaŭsia pra rasijskaha prezidenta i premjera.
Kamientary