Biełaruś nie źbirajecca zhortvać vajennaje supracoŭnictva z Rasijaj z-za roznahałośsiaŭ u inšych śfierach. Ab hetym zajaviŭ Alaksandr Łukašenka siońnia pry dakładzie zadumy sumiesnaha stratehičnaha vučeńnia ŭzbrojenych sił Biełarusi i Rasii «Zachad-2017».
«Dla srodkaŭ masavaj infarmacyi asabliva adznaču, što nasupierak mierkavańniam asobnych ekśpiertaŭ nichto nie źbirajecca zhortvać supracoŭnictva z Rasijaj u vajennaj vobłaści z-za ŭźnikłych roznahałośsiaŭ u inšych śfierach. Naadvarot, vučeńnie źjaŭlajecca demanstracyjaj našaha pastajanstva ŭ harantavańni biaśpieki dvuch brackich narodaŭ», — zajaviŭ kiraŭnik dziaržavy.
«Jak by ni składvalisia našy adnosiny ŭ halinie nafty, hazu, praduktaŭ charčavańnia i inšaha, heta ŭsio pytańni vyrašajucca. Heta našy pytańni — Biełarusi i Rasii. A voś žartavać ź biaśpiekaj, abaranazdolnaściu našych supolnych miežaŭ ni ŭ jakim razie nielha. Heta nie padlahaje nijakamu torhu», — padkreśliŭ biełaruski lidar.
Pavodle jaho słoŭ, mižnarodnaja abstanoŭka abaviazvaje bieśpierapynna pavyšać majsterstva i ŭzrovień rehijanalnaj hrupoŭki vojskaŭ dla abarony zachodnich miežaŭ «Sajuznaj dziaržavy». «Majučaje adbycca vučeńnie źjaŭlajecca lepšym sposabam pravieryć hatoŭnaść vajskoŭcaŭ dźviuch krain da ŭzajemadziejańnia. Takim čynam my ŭmacoŭvajem svaju ahulnuju abaranazdolnaść i budziem heta rabić nadalej», — skazaŭ kiraŭnik krainy.
Alaksandr Łukašenka nahadaŭ, što šmat hadoŭ tamu Biełaruś i Rasija damovilisia pravodzić takija vučeńni pa čarzie na terytoryi adnoj i druhoj krain, zaraz čarha Biełarusi.
Jon taksama adznačyŭ, što na zachodnim nakirunku ŭ Biełarusi i Rasii stvorana mahutnaja hrupoŭka ŭzbrojenych sił, asnovu jakich składaje biełaruskaja armija.
«U vypadku kanfliktu, nie daj boh vajny, isnuje peŭny płan viadzieńnia bajavych dziejańniaŭ siłami biełaruskich Uzbrojenych Sił, jakija nieadkładna padmacoŭvajucca adpaviednymi ŭzbrojenymi siłami Rasijskaj Fiederacyi, — skazaŭ kiraŭnik dziaržavy. — My ni ad kaho nikoli nie chavali i nie chavajem, što ŭ mirny čas porach treba trymać suchim».
Kamientary