Adarja Huštyn, karespandentka infarmacyjnaha ahienctva BiełaPAN, akazałasia ŭ śpisie asob, jakim zabaronieny ŭjezd na terytoryju Azierbajdžana. Nahodaj staŭ artykuł, pryśviečany Nahornamu Karabachu — terytoryi, jakuju azierbajdžanskija ŭłady ličać akupavanaj armianami.
Ahułam u śpisie 623 asoby z roznych krainaŭ śvietu. Prafiesii zusim roznyja: pradstaŭniki fondaŭ, muzyki, režysiory, palityki… Heta tyja, chto, pavodle razumieńnia Azierbajdžana, parušyŭ terytaryjalnuju cełasnaść krainy. Žurnalistaŭ, kaniečnie, šmat: tut i «Ńju-Jork tajms», i «Echo Moskvy», i «Łajfńjus», i «Bierlinier cajtunh»…
Sam artykuł vyjšaŭ u mai 2016 hoda. Ale pra svajo imia ŭ śpisie pierson non-hrata na terytoryi Azierbajdžanu žurnalistka daviedałasia niadaŭna.
«Cikavilisia historyjaj błohiera Łapšyna, jakoha Biełaruś płanuje vydać Azierbajdžanu, jon byŭ u tym śpisie. I raptam vyśvietliłasia, što majo imia taksama tam, — kaža Adarja Huštyn. — Kali ja była ŭ Karabachu, to razumieła, što peŭnyja nastupstvy mohuć być. Jašče kali artykuł tolki byŭ apublikavany, na maju pryvatnuju poštu, jakaja nidzie nie paznačana, pryjšoŭ list ad nieznajomca z pytańniem, ci byŭ u mianie dazvoł ad azierbajdžanskaha MZS, kab zajechać na «akupavanuju terytoryju Azierbajdžana». Ja razumieła, što, chutčej za ŭsio, heta chtości ź siłavoha błoku Azierbajdžana, ale pierapisku nie padtrymała».
Kryŭdy na azierbajdžancaŭ u žurnalistki niama.
«Ja była va ŭsich postsavieckich krainach, aproč Azierbajdžana i Turkmienistana. I ŭ bližejšy čas ja naŭrad ci zmahu trapić u Azierbajdžan, kaniečnie. Ščyra kažučy, škada, hetaja kraina mnie vielmi cikavaja. Honaru za toje, što majo imia ŭ tym śpisie nie adčuvaju… Ale i złoby anijakaj niama, ja z pavahaj staŭlusia da Azierbajdžana jak da krainy i maju siabroŭ tam. Ja padzialaju krainu i režym», — kamientuje Adarja.
Akramia Adarji, u śpisie niepažadanych asobaŭ jašče čaćviora čałaviek, paznačanych jak hramadzianie Biełarusi: błohier Pavieł Andryjeŭski, žurnalist Viktar Kanaploŭ (redaktar partała «Naša srieda», pryśviečanaha rasijska-armianskim adnosinam), Viera Taryvierdzijeva — udava kampazitara Mikeła Taryvierdzijeva, skulptar i mastak Spartak Aruciunian.
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary