Minabarony patłumačyła, navošta ŭ Barysavie pryzyŭniki prysiahali SSSR
10 śniežnia na centralnaj płoščy Barysava adbyłasia ŭračystaja cyrymonija pryniaćcia prysiahi. Pierad pryniaćciem prysiahi Biełarusi, u jakoj uziało ŭdzieł kala 300 navabrancaŭ, simvaličnuju prysiahu SSSR pryniali chłopcy, apranutyja ŭ savieckuju formu.
Inicyjatar pierformansa — kamandujučy vojskami Paŭnočna-zachodniaha apieratyŭnaha kamandavańnia Alaksandr Valfovič, uradženiec Kazani, vypusknik Maskoŭskaj vyšejšaj ahulnavajskavoj vučelni i Vajskovaj akademii Hienštaba Rasii.
«Była zadača pakazać padčas cyrymonii pryniaćcia prysiahi pierajemnaść pakaleńniaŭ. Siońnia, jak by na imhnieńnie zazirnuŭšy ŭ lehiendarnaje minułaje, my pakazali, jak prymali prysiahu našy pradziedy i dziady ŭ dalokim 1918 m i 1941 hodzie, jak prymali jaje ŭ časy Savieckaha Sajuza. I ŭśled za imi, vykonvajučy pierajemnaść pakaleńniaŭ abaroncaŭ Ajčyny, prynieśli ŭračystuju klatvu na viernaść našaj Radzimie — Respublicy Biełaruś — i našy vajskoŭcy. Ja dumaju, što heta mierapryjemstva stanie dobraj tradycyjaj. Zmacavaŭšy słovy klatvy ŭłasnaručnym podpisam, maładyja voiny Raboča-Sialanskaj Čyrvonaj Armii ŭ składanych umovach adstajali niezaležnaść maładoj savieckaj dziaržavy. Mienavita z hetymi słovami našy baćki i dziady išli ŭ boj z fašysckimi zachopnikami ŭ hady Vialikaj Ajčynnaj vajny. Nie parušyŭšy klatvy, stupili ŭ biaśśmiercie ŭ harach dalokaha Afhanistana našy ziemlaki», — cytuje słovy Valfoviča «Biełaruskaja vajennaja hazieta».
«Naša Niva» spytała ŭ načalnika ŭpraŭleńnia infarmacyi hałoŭnaha ideałahičnaha ŭpraŭleńnia Ministerstva abarony Uładzimira Makarava, navošta ŭsio heta było treba.
«Mahu zapeŭnić, što prysiaha na viernaść biełaruskamu narodu była pryniataja ŭ adpaviednaści z zakanadaŭstvam Respubliki Biełaruś, prysiahali pa-biełarusku i pa-rasiejsku, — pačaŭ Makaraŭ. — A pierad haściami i novym papaŭnieńniem była pakazana rekanstrukcyja rytuała vajskovaj prysiahi sałdatami roznych pieryjadaŭ XX stahodździa. Rekanstrukcyja była mienavita dla haściej, było padkreślena, što našyja baćki i dziedy šli ŭ boj z fašysckimi zachopnikami ŭ časy Druhoj suśvietnaj vajny».
U čym ideałahičnaja karyść prysiahi SSSR, Makaraŭ patłumačyć nie zdoleŭ, ale padkreśliŭ inšaje.
«Ni ŭ kaho nie pavinna być sumnievaŭ, što niezaležnaść, terytaryjalnaja cełasnaść, suvierenitet Biełarusi budzie zabiaśpiečany usioj sistemaj nacyjanalnaj biaśpieki, u tym liku — Uzbrojenymi siłami», — padsumavaŭ ideołah Minabarony.
Kamientary