Pasolstva Turcyi ŭ Minsku vykazała ŭdziačnaść Biełarusi za padtrymku paśla sproby vajennaha pieravarotu, ździejśnienaj uviečary 15 lipienia, i zajaviła ab narmalizacyi situacyi ŭ krainie.
«My vykazvajem udziačnaść družalubnym krainam, u tym liku Biełarusi, za pasłańni ŭ adras Turcyi sa słovami padtrymki i salidarnaści i telefonnyja zvanki vysokapastaŭlenym słužbovym asobam va ŭradzie našaj krainy dla vykazvańnia padtrymki», - havorycca ŭ paviedamleńni tureckaha pasolstva ŭ Biełarusi,
«Uviečary 15 lipienia vajskoŭcy roznych vajskovych zvańniaŭ u składzie hrupy, jakaja ŭźnikła va Ŭzbrojenych siłach Turcyi, pačali sprobu dziaržaŭnaha pieravarotu, — paviedamlaje dypłamatyčnaje pradstaŭnictva Turcyi ŭ Minsku. — Sproba vajennaha pieravarotu, siarod udzielnikaŭ jakoha byli zaŭvažanyja pieravažna Kamandavańnie vajenna-pavietranymi siłami, Hałoŭnaje kamandavańnie žandarmieryi i elemienty asobnych broniehrupaŭ, z samaha pačatku była advierhnutaja ŭsim składam Uzbrojenych sił Turcyi».
«U suviazi sa sprobaj pieravarotu Hałoŭnaje ŭpraŭleńnie biaśpieki i prakurorski korpus Turcyi apieratyŭna pryniali nieabchodnyja miery i praduchilili jaho raźvićcio, — adznačajecca ŭ paviedamleńni. — Prezident, premjer-ministr, urad našaj krainy i členy Vialikaha nacyjanalnaha schodu Turcyi ŭ poŭnaj salidarnaści z Uzbrojenymi siłami Turcyi zaniali bok demakratyi i pravavoj dziaržavy. Turecki narod, abjadnaŭšy namahańni i prademanstravaŭšy histaryčnuju salidarnaść ź dziaržavaj, vyjšaŭ na vulicy i, staŭšy na šlachu tankaŭ bandy miaciežnikaŭ, pieraškodziŭ sprobie pieravarotu».
Jak adznačajuć u pasolstvie, «sproby miaciežnikaŭ zachapić budynak Tureckaj teleradyjokampanii i raźviazać infarmacyjnuju kampaniju z dapamohaj takich srodkaŭ masavaj kamunikacyi, jak pryvatnyja drukavanyja orhany i internet, nieŭzabavie byli sarvanyja. U hety pieryjad tureckija ŚMI dali ŭrok demakratyi». «Usie palityčnyja partyi ŭ našaj krainie vystupili ŭ abaronu demakratyi, palityčnaj voli i Vialikaha nacyjanalnaha schodu Turcyi, jaki jaje vykazvaje», - havorycca ŭ paviedamleńni. 16 lipienia adbyłosia pazačarhovaje pasiadžeńnie Vialikaha nacyjanalnaha schodu Turcyi, jakoje pryniało sumiesnuju dekłaracyju.
Dyppradstaŭnictva infarmuje, što padčas apieracyj suprać udzielnikaŭ pieravarotu «aryštavana kala 3.000 miaciežnikaŭ, paradku 100 čałaviek zachoplenyja miortvymi ŭ časie sutyknieńniaŭ», achviarami buntu staŭ 161 čałaviek, u tym liku cyvilnyja asoby, paciarpieli kala 1.400 čałaviek.
U pasolstvie zajaŭlajuć, što «16 lipienia žyćcio ŭ Turcyi viarnułasia ŭ narmalnaje rečyšča». «Miaciežniki nie atrymali padtrymki mižnarodnaj supolnaści. Ad šerahu dziaržaŭ i mižnarodnych arhanizacyj, siarod jakich i Biełaruś, byli atrymany pasłańnia / zvaroty / telefonnyja zvanki sa słovami salidarnaści, značeńnie jakich takoje vialikaje dla Turcyi», - havorycca ŭ paviedamleńni.
Pasolstva adznačaje, što «fakt ździajśnieńnia sproby dziaržaŭnaha pieravarotu siłami terarystyčnaj arhanizacyi Fietuły Hiulena FETO vidavočny». «Urad našaj krainy sprabavaŭ davieści da viedama družalubnych i sajuznych dziaržaŭ terarystyčnuju pryrodu hetaj arhanizacyi i sapraŭdny tvar Fietuły Hiulena (były imam i prapaviednik, jaki žyvie ŭ Piensilvanii, ZŠA. - BiełaPAN.). Na žal, dalikatnaść hetaha pytańnia i pa siońniašni dzień u poŭnaj miery nie była asensavanaja. Tak vyjaviłasia sapraŭdnaje abličča hetaj miaciežnaj terarystyčnaj arhanizacyi».
Sproba pieravarotu adbyłasia ŭviečary 15 lipienia. Byli pierakrytyja masty praz Basforski praliŭ, uviedzienaja kamiendanckaja hadzina, spynienyja avijaznosiny. Prezident Turcyi Redžep Taip Erdahan zaklikaŭ narod vyjści na vulicy. Da ranicy 16 lipienia pieravaha akazałasia na baku viernych uradu siłavikoŭ.
Alaksandr Łukašenka nakiravaŭ Erdahanu pasłańnie sa słovami padtrymki. MZS Biełarusi ŭ svaju čarhu «rašuča asudziŭ złačynnuju sprobu niezakonnaha źviaržeńnia dziaržaŭnaj ułady», a taksama zajaviŭ, što «całkam salidarny z tureckim kiraŭnictvam».
Kamientary