Rasija viadzie pracu pa stvareńni ahulnych ź Biełaruśsiu i Kazachstanam baz dadzienych hramadzian, jakim zabaronieny vyjezd za miažu. Pra heta zajaviła staršynia Savieta Fiederacyi Fiederalnaha schodu Rasii Valancina Maćvijenka, razmaŭlajučy z žurnalistami na trecim Forumie rehijonaŭ Biełarusi i Rasii.
Jana adznačyła, što ludzi, jakija źjaŭlajucca daŭžnikami pa štrafach i padatkach, niepłacielščyki alimientaŭ nie mohuć vyjazdžać z Rasii da ich vypłaty. Ale niekatoryja hramadzianie karystajucca adsutnaściu kantrolu na biełaruska-rasijskaj miažy i vyjazdžajuć praź Biełaruś.
«Śpisy pieradavajcie nam, my dapamožam vyrašać», — skazaŭ staršynia Savieta Respubliki Nacyjanalnaha schodu Biełarusi Michaił Miaśnikovič.
Maćvijenka adznačyła, što ciapier Ministerstva justycyi Rasii viadzie pieramovy ź biełaruskimi i kazachstanskimi kalehami, kab była stvoranaja adzinaja infarmacyjnaja baza ab takich hramadzianach. «Kab my pieradavali našym partnioram infarmacyju ab tych asobach, da jakich u nas jość pretenzii, kab im taksama spyniali vyjezd u Biełarusi i Kazachstanie. Dumaju, što ŭ hetym zacikaŭlenyja našy partniory», — skazała jana.
Maćvijenka adznačyła, što pa vynikach hetych pieramoŭ mohuć być padpisanyja mižuradavyja pahadnieńni.
«Tym, chto nie płacić alimienty i vyjazdžaje na Bahamskija vyspy adpačyvać, my heta nie dazvolim. Spačatku zapłaci alimienty na ŭtrymańnie svaich dziaciej, a potym, kali łaska, volny. Laci, kudy chočaš», — skazała Maćvijenka.
Miaśnikovič dadaŭ: «Kali zastanucca hrošy».
Kamientary