Urad Kryma rekamienduje śpiavačcy Džamale źmianić hramadzianstva z ukrainskaha na rasijskaje i viarnucca ŭ Krym.
Pra heta ŭ Piekinie zajaviŭ vice-premjer rasijskaj administracyi Kryma Hieorhij Muradaŭ, pieradaje TASS.
«Ja padkreślivaju, što Krym zaŭsiody budzie rady vystupleńniu Džamały, heta jaje radzima», — skazaŭ jon.
Tamu, praciahnuŭ jon, «joj zastałosia pravieści nievialikija mierapryjemstvy, źviazanyja sa źmienaj hramadzianstva, pryjechać na Radzimu i vystupać u siabie».
«Temy departacyi zaciahnulisia i pavinny być skončanyja, treba viartacca. My joj zaŭsiody rady, vinšujem i dumajem, što siarod atrymanych joju rasijskich hałasoŭ šmat ludziej ź liku krymskich tataraŭ, jakija ŭ nas u Krymie pražyvajuć», — dadaŭ Muradaŭ.
Susanna Džamaładzinava, jakaja vystupała pad psieŭdanimam Džamała, naradziłasia 27 žniŭnia 1983 hoda ŭ horadzie Oš (Kirhizskaja Savieckaja Sacyjalistyčnaja Respublika, SSSR).
Baćka — Alim Džamaładzinaŭ, krymski tataryn, a jaje maci — Halina Tumasava, armianka, rod jakoj pachodzić z Nahornaha Karabacha.
Dziacinstva Susanny prajšło ŭ Krymie, u siale Małarečanskaje pad Ałuštaj, kudy siamja viarnułasia ŭ 1989 hodzie.
Džamała ź pieśniaj «1944», pryśviečanaj departacyi krymskich tataraŭ, stała pieramožcaj 61-ha piesiennaha konkursu «Jeŭrabačańnie», jaki prajšoŭ u stalicy Šviecyi na kancertna-spartyŭnaj arenie Globen.
U Krymie paśla akupacyi prarasijskaja ŭłada ŭščamlaje krymskich tataraŭ: kanał ATR byŭ vymušany pierajechać u Kijeŭ, 18 krymskich tataraŭ byli kinutyja za kraty. Akramia taho, prarasijskaja ŭłada zabaraniła šmatlikim krymčanam ujezd na paŭvostraŭ, u pryvatnaści Mustafie Džamilevu, Rafatu Čubaravu, Sinavieru Kadyravu i Iśmietu Jukselu.
Kamientary