13 maja Papa Rymski Francišak pryznačyŭ novaha Apostalskaha nuncyja ŭ Biełarusi — mansińjora Habara Pintera, jaki da hetaha byŭ daradcam Apostalskaj nuncyjatury ŭ Vienie. Pra heta paviedamlaje catholic.by
Apostalski nuncyj źjaŭlajecca pastajannym pradstaŭnikom pantyfika ŭ dziaržavie i miascovym Kaściole. Nuncyj źjaŭlajecca hałoŭnym dypłamatam Vatykana ŭ krainie, u jakuju jon pasłany — jon umacoŭvaje dvuchbakovyja suviazi i suviaź pamiž Śviatym Pasadam i biełaruskimi katolikami, padtrymlivaje paradami i prykładam miascovych biskupaŭ, abaraniaje intaresy Kaścioła i krainy.
«Ad imia Kanfierencyi Katalickich Biskupaŭ u Biełarusi zaklikaju ŭsich vas malicca ab pośpiechu misii novaha Apostalskaha nuncyja ŭ Biełarusi, na karyść Kaścioła i našaha naroda», — skazaŭ u zvarocie na sajcie Catholic.by pra pryznačeńnie novaha Nuncyja Staršynia Kanfierencyi Katalickich Biskupaŭ u Biełarusi arcybiskup Tadevuš Kandrusievič.
***
Habar Pinter (Gábor Pintér) naradziŭsia 9 sakavika 1964 h. u Vienhryi, staŭ śviatarom ŭ 24 hady, a na dypłamatyčnaj słužbie Vatykana znachodzicca z 1996 h. Jon pracavaŭ u Haici, Balivii, krainach Skandynavii, Francyi, na Filipinach i ŭ Aŭstryi. Vałodaje niamieckaj, italjanskaj, anhlijskaj, francuzskaj, ispanskaj, kreolskaj, šviedskaj i rasijskaj movami.
U śniežni 2015 hodu zakončyŭ svajo słužeńnie na Biełarusi papiaredni nuncyj — arcybiskup Kłaŭdya Hudžeroci. Jon zapomniŭsia biełarusam-katolikam vialikaj pavahaj da biełaruskaj movy i kultury, uvahaj da žyćcia zvyčajnych viernikaŭ, blizkaściu da biełaruskaj moładzi. Zaraz arcybiskup Kłaŭdya Hudžeroci — Apostalski nuncyj va Ukrainie.
***
Śpis apostalskich nuncyjaŭ u Biełarusi:
Habryel Mantalva Ihiera (Kałumbija, 1993—1994), Ahaścina Markieta (Italija, 1994—1996), Daminik Hrušaŭski (Słavakija, 1996-2001), Ivan Jurkavič (Słavienija, 2001—2004), Marcin Vidavič (Charvatyja, 2004—2011), Kłaŭdya Hudžeroci (Italija, 2011—2015).
Kamientary