Staršynia ruchu «Za Svabodu» Alaksandr Milinkievič nakiravaŭ vinšavańnie partyi «Prava i spraviadlivaść» ź pieramohaj na parłamienckich vybarach u Polščy, paviedamlaje pres-słužba ruchu.
«Šanoŭny Sp. Kačyński! Šanoŭnaja spn. Šydła! Chaču pavinšavać vas i Partyju «Prava i spraviadlivaść» ź pierakanaŭčaj pieramohaj na parłamienckich vybarach u Polščy. Ad usiaho serca žadaju vam usialakich pośpiechaŭ u dziejnaści ŭradu PiSu pa realizacyi prahramy źmienaŭ ŭ Polščy, krainie, ź jakoj Biełaruś abjadnoŭvajuć tryvałyja kulturnyja, histaryčnyja, ekanamičnyja i čałaviečyja suviazi. Mocnaja Polšča ŭ intaresach niezaležnaj i jeŭrapiejskaj Biełarusi», — havorycca ŭ vinšavańni
«My vysoka cenim dasiahnieńni raniejšaha ŭradu PiSu i prezidenta Lecha Kačyńskaha ŭ spravie salidarnaści i padtrymki demakratyi, hramadzianskaj supolnaści i niezaležnaści Biełarusi, u pryvatnaści stvareńnie kanału «Biełsat», adkryćcio Stypiendyjalnaj prahramy imia K.Kalinoŭskaha, adnaŭleńnie dziejnaści Radyjo «Racyja» i mnohija inšyja prahramy», — adznačajecca ŭ paviedamleńni.
«Ja ŭpeŭnieny, što polski ŭrad budzie praciahvać jahiełonskuju palityku padtrymki niezaležnaści i jeŭrapiejskaha vybaru majoj krainy i budavać ščylnyja adnosiny pamiž narodami našaha rehijonu Centralnaj Jeŭropy. Vieru, što ŭ vyniku našych sumiesnych namahańniaŭ adbuducca demakratyčnyja źmieny u majoj krainie i ŭzmocniacca pryjaznyja dačynieńni pamiž biełaruskim i polskim narodami», — havorycca ŭ vinšavańni.
Kamientary