Jak čałaviek, što vučyŭsia ŭ Švecyi i Ńju‑Jorku, jon viedaje, z čaho pačynać.
Asnoŭny napramak vysiłkaŭ Ihara Zahumienava — vyvieści biełaruskuju muzyku va ŭsiaśvietny kantekst ci naadvarot — usiaśvietny kantekst uvieści ŭ biełaruskuju muzyku. Jak čałavieku, što vučyŭsia ŭ Švecyi dy Ńju‑Jorku, jamu heta dajecca praściej za inšych. Adno hetaje vartaje pavahi.
Novaja płytka — «zvalenyja ŭ kuču» zapisy, zroblenyja paśla albomu «Bionic». Materyjał roznabakovy, nie taki kanceptualna‑zanudny (sorry, atmasferna‑medytatyŭny). Asabliva heta adčuvajecca na žyvych vystupach Ihara. Ad starych časoŭ zIGZAG‑u zastałasia lohkaść, bieskłapotnaść, amal dziciačaja raźniavolenaść.
Zahałoŭnaja pieśnia — «prykolny» markietynhavy krok (uspomniłasia «Ja znaju tri słova» Najka Barzova). Ihar, mahčyma, pračytaŭ knižku pa pramocyi hurtu. Ci jamu pryjeŭsia pseŭdaramantyčny vobraz paj‑chłopčyka. U toje, što Ihara nasamreč cikavić vyšejzhadanaje słova, asabliva nia vierycca.
Patasnaja «World Mine Free», zapisanaja dla samitu ŭ Najrobi, dzie Ihar, nie raŭnujučy jak Bona z U2, zmahaŭsia za ačyščeńnie afrykanskaj ziamli ad min. Toj ža pijar, ale bolš cyvilizavany. Na hitary, uličvajučy adkaznaść zapisu, padyhraŭ Pit Paŭłaŭ. …Hm, Ihar, aściarožna — z takimi pieśniami zakančvajuć karjeru ŭ rok‑muzycy, ale nie pačynajuć. Usiaśvietny dośvied pakazvaje — kab śpiavać pieśni pra «mir va ŭsim miry», treba spačatku praśpiavać toje, što budzie padabacca santechnikam i vodapravodčykam… One love, one life…
Taksama prysutničajuć remiks na zaježdžanuju «Pieśniu chvali» i dva kavery God's Tower.
«Strašna dalokija jany ad narodu» ((s) Uł. Lenin).
Kamientary