Jak minskija śledčyja raźviali na hrošy rasijskaha miljaniera — sud
Bahaty rasijanin śćviardžaje ŭ sudzie, što vykłaŭ 30 tysiač dalaraŭ za «abjektyŭnaje rasśledavańnie».
Tolki ŭ Minskim haradskim sudzie skončyŭsia praces nad byłymi supracoŭnicami Ministerstva justycyi, jakija za hrošy prymali ekzamieny ŭ jurystaŭ, tam ža pačaŭsia novy skandalny sud. Ciapier nad aficerami justycyi — byłymi śledčymi Centralnaha RASK Minska. Ich vinavaciać u atrymańni chabaru 30 tysiač dalaraŭ na dvaich.
Bahatyja taksama płačuć
Hałoŭny śviedka pa hetaj spravie — 69-hadovy biznesoviec-miljanier Viačasłaŭ Pahosaŭ. Jon hramadzianin Rasii, maje biznes u Rasii i Ispanii. A ŭ Minsku ŭ jaho niekalki kvater i maładaja sužycielka. Dakładniej, raniej była sužycielka.
Tut ža, u Minsku, žyvie i vučycca jaho dačka. Na jaje i aformleny ŭ stalicy try kvatery.
Historyja pačałasia ŭ 2011 hodzie.
«Ja pražyvaŭ u katedžy, ale časta vyjazdžaŭ pa pracy za miažu. U adzin z maich adjezdaŭ zaleźli ŭ katedž i vynieśli adtul siejf», — raskazaŭ na sudzie svoj vypadak biznesoviec.
Jon žyŭ sa svajoj sužycielkaj Viktoryjaj. Taja to žyła ź im, to vyjazdžała da maci. U toj dzień jaje taksama nie było. Tamu klučy pakinuŭ pryjacielu Anatolu, kab jon adamknuŭ dom ryełtaram. A toj jak pryjechaŭ, ubačyŭ, što siejfa niama. Vyklikaŭ milicyju. Praŭda, śladoŭ uzłomu ŭ katedžy nie vyjavili. U siejfie ž było niekalki socień tysiač dalaraŭ, darahi piarścionak, załatyja maniety.
Pahosaŭ zapadozryŭ u złačynstvie svaich rasijskich pryjacielaŭ, jakija haściavali ŭ jaho domie. Zaviali kryminalnuju spravu. Ale, jak kaža Pahosaŭ, pakolki złačyncy znachodziacca ŭ Rasii, tudy i mielisia adpravić dakumienty pa spravie. «Mnie nieadnarazova kazali śledčyja, što spravu buduć adpraŭlać u Rasiju. Ale ŭsio nijak. I tolki miesiac tamu adpravili — paśla ŭsich hetych padziej».
U sakaviku 2014 jon źviarnuŭsia ŭ milicyju z novaj spravaj. Ź siejfa ź minskaj kvatery źnikli 95 tysiač dalaraŭ. Padazravać jon pačaŭ sužycielku Viktoryju. Kvatera była na sihnalizacyi, kluč byŭ u žančyny, a ŭzłomu nie było. U dadatak, da hetaha nieadnarazova łaviŭ žančynu na kradziažach. «Viedaŭ, što jana krała ź siejfa. Ale daravaŭ joj».
Ale dźvie kryminalnyja spravy pa zajavach Pahosava padviśli. Miž inšym, jon pryhadaŭ na sudzie, što ŭkłaŭ u adzin ź inviestprajektaŭ u Biełarusi 5 miljonaŭ dalaraŭ. Viarnulisia da jaho tolki dva. Sprava była niačystaja, i jon sprabavaŭ praz sud atrymać hrošy. Marna. A jašče jon kamuści ŭ Biełarusi pazyčyŭ 600 tysiač dalaraŭ. I taksama nie zmoh viarnuć. Nie dapamahli i ŭ orhanach.
«Majučy vopyt, što spravy spynialisia i ja ničoha nie damahaŭsia, ja i ŭ hety raz nie mieŭ peŭnaści, što niechta budzie abjektyŭna raźbiracca».
Znajomy Pahosava, ułaśnik adnaho ź minskich restaranaŭ Artur skazaŭ, što moža paznajomić jaho z čałaviekam, jaki dapamoža.
«Mahu dapamahčy za $10 tysiač»
Tak, pa słovach Pahosava, u krasaviku 2014 pačałosia znajomstva biznesoŭca z namieśnikam načalnika Centralnaha rajonnaha adździeła Śledčaha kamiteta Minska Aleham Mielnikavym. Pahosaŭ prasiŭ paspryjać u «abjektyŭnym rasśledavańni».
«Mahu dapamahčy, ale dla hetaha tysiač 10 dalaraŭ chopić», — tak pieradaje na sudzie słovy śledčaha Viačasłaŭ Pahosaŭ. «Skazaŭ, što raźbiare spravu, a paśla my sustreniemsia».
Praz dva dni jany sustrelisia na kvatery ŭ rasijanina. Tam i pieradaŭ Mielnikavu, jak śćviardžaje, 10 tysiač dalaraŭ. «Kab abjektyŭna razabralisia, dakazali, što heta maja majomaść i viarnuli. I pakarali vinavatych».
Pahosaŭ i Mielnikaŭ trymali kantakt praz restaratara Artura. Śledčy nastojvaŭ na kanfidencyjnaści: nijakich pramych telefanavańniaŭ, navat kali biznesoŭca pačali vyklikać u SK pa jaho spravach, staralisia paźbiahać razmoŭ u kabiniecie. Niekalki sustreč było ŭ lesie za horadam, pa darozie na Zasłaŭje.
Sa słovaŭ Pahosava, na adnu z sustreč u restaran Mielnikaŭ pryvioŭ svajho kalehu Siarhieja Kastyku, namieśnika načalnika 1-ha adździaleńnia Centralnaha RASK. «Heta dla mianie było niečakanaściu. Mielnikaŭ paśpiašaŭsia supakoić: maŭlaŭ, heta druhi namieśnik, jaki zajmajecca katedžam, budzie nam dapamahać. U niejki momant Mielnikaŭ adyšoŭ, i Kastyka kaža: kab da kanca davieści spravu, patrebny jašče 20 tysiač dalaraŭ. Ja skazaŭ, što ŭ mianie z saboj niama takich hrošaj. «A doma jość?» — «Jość». — «Davaj pajedziem damoŭ».
Sa słovaŭ Pahosava, na kvatery jon pieradaŭ kožnamu sa śledčych pa 10 tysiač dalaraŭ. Ale spravy ŭsio nie zrušvalisia ź miesca. Rasśledavańnie viałosia, tolki vyniku nie było. Śledčyja valili ŭsio na svajho načalnika: maŭlaŭ, jon spravu zakryvaje, nie daje im rasśledavać. Jak śviedčać dakumienty, sprava pa kradziažy ŭ 2014 niekalki razoŭ spyniałasia, a zatym znoŭ zavodziłasia.
Pahosaŭ u vyniku sam adšukaŭ tych, chto skraŭ jaho siejf u 2011.
«Kali ja ŭ Rasii znajšoŭ hetych ludziej, jany častku skradzienaha addali. Ale źnik darahi piarścionak — koštam 500 tysiač dalaraŭ. Jany raśpiłoŭvali siejf u znajomaha. Znajšoŭ jaho: spadziavaŭsia, što piarścionak tam u tajniku zastaŭsia. Ale nie. Haspadar haraža zabraŭ tysiač 40—45 jeŭra i załatyja maniety — 100 ci 200 štuk. Usio viarnuŭ».
Pahosavu raskazali, što klučy ad katedža ŭzamien na kaštoŭnaści (piarścionki z bryljantami, zavušnicy niejkija) im pieradała Viktoryja.
«Dla mianie heta było šokam, — kaža miljanier. — Ja ź joj 6 hadoŭ kantaktavaŭ. Dapamahaŭ va ŭsim: płaciŭ za vučobu, płaciŭ za žyćcio, za adzieńnie, hrošy davaŭ…»
Biznesoviec u vyniku nastojvaŭ, kab Mielnikaŭ i Kastyka viarnuli hrošy, pakolki jany zavalili rasśledavańnie. Tyja nie addavali, a «maŭčali, ničoha nie havaryli».
U vyniku ŭ kastryčniku 2014 rasijanin źviarnuŭsia ŭ KDB i raskazaŭ pra chabar. Jašče niejki čas śledčych raspracoŭvali, a zatym aryštavali. Padrabiaźniej pra toje, jak viałasia raspracoŭka Mielnikava i Kastyki, stanie viadoma paźniej. Im pahražaje ad 5 da 15 hadoŭ kałonii z kanfiskacyjaj majomaści.
Kamientary