Palicyja Prahi ličyć niezakonnym znachodžańnie na matčach KCHŁ hledačoŭ ź bieł-čyrvona-biełym ściaham

Palicyja Prahi pryznała zakonnymi dziejańni achovy spartyŭnaj areny, jakaja zabaraniła fanatam znachodzicca ź bieł-čyrvona-biełym ściaham na matčy Kantynientalnaj chakiejnaj lihi pražskaha «Lva» ź minskim «Dynama» 28 lutaha, paviedamiŭ aktyvist biełaruskaj apazicyi Alaksiej Šydłoŭski, jaki atrymaŭ palityčny prytułak u Čechii. 

«Ja ź siabrami pryjšoŭ na hety matč z nacyjanalnym biełaruskim ściaham padtrymać «Dynama», — skazaŭ Šydłoŭski. — U druhim pieryjadzie padyšli achoŭniki i paprasili prybrać ściah, tamu što heta nie adpaviadaje niejkim praviłam, adnak jakim mienavita, rastłumačyć nie zdoleli. Padčas treciaha pieryjadu jany paŭtaryli svaje patrabavańni, a zatym, kali ja admoviŭsia ich vykanać, z prymianieńniem siły vychapili ściah». 

Paśla hetaha incydentu Šydłoŭski źviarnuŭsia ŭ palicyju Prahi. Dniami jon atrymaŭ aficyjny adkaz, u jakim havorycca, što Šydłoŭski parušyŭ niekalki punktaŭ praviłaŭ naviedvańnia hulniaŭ chakiejnaha kłuba «Leŭ», tamu achoŭnyja słužby dziejničali na zakonnych padstavach.

Niahledziačy na heta, Šydłoŭski maje namier i nadalej naviedvać spartyŭnyja spabornictvy ŭ Prazie z udziełam biełaruskich kłubaŭ i zbornych ź bieł-čyrvona-biełym ściaham. «Na žal, Jeŭropa zaraz stračvaje svajo abličča abaroncy pravoŭ čałavieka. U maim i inšych vypadkach, na žal, pieramahajuć rasijskija hrošy. U pryvatnaj razmovie mnie skazali, što niejki pradstaŭnik rasijskich sponsaraŭ zapatrabavaŭ zabrać u mianie ściah», — paviedamiŭ jon.

Šydłoŭski nieadnarazova źviedvaŭ u Biełarusi pieraśledy za svaje hramadska-palityčnyja pierakanańni. Hetak, u lutym 1998 hoda jaho asudzili na paŭtara hoda pazbaŭleńnia voli pavodle abvinavačańnia ŭ złosnym chulihanstvie za naniasieńnie antyprezidenckich hrafici na ścieny damoŭ u Stoŭbcach (Minskaja vobłaść). U 2001 hodzie za ŭdzieł u dziejnaści niezarehistravanaha maładziožnaha ruchu «Zubr» Šydłoŭski byŭ pryhavorany da dvuch hadoŭ papraŭčych rabot i vyklučany ź Instytuta sučasnych viedaŭ. U kancy 2007-ha ŭ dačynieńni da jaho raspačali jašče adnu kryminalnuju spravu zhodna z artykułam «Chulihanstva», jaki praduhledžvaje da 10 hadoŭ pazbaŭleńnia voli. Padstavaj dla hetaha stała bojka ŭ mahazinie, jakaja ŭźnikła padčas svarki Šydłoŭskaha z pradaŭcom z-za partreta Alaksandra Łukašenki. Šydłoŭski zajaŭlaŭ, što bojka była spravakavanaja. Nie čakajučy suda, jon vyjechaŭ ź Biełarusi i ŭ 2009 hodzie atrymaŭ palityčny prystanak u Čechii.

• 0
• 0
• 0
• 0
• 0
• 0
• 0
• 0