ПАШТОЎКА З АМЭРЫКІ
Duke Tower працінае неба
сонны Дарам складаецца ўдвая
запіхваецца ў капэрту
і некалі паштарка прынясе табе
адцінак гэтай Бадрыяравай пустэльні
бясконцай усьмешкі
на вялікім твары
што напяты на культурную традыцыю
магчыма дабрабыт
альбо добаразычлівасьць
як хочацца табе мне пажадаць
вясновай шчырай усьмешкі
і ўпэўненасьці
што сьвет ня зьнік
нават калі ты на Акрэсьціна
праз краты ці ня чуеш
расьцьвітае перамогі бэз
ПАКОІ
Вітальня
у вітальнях вітаюцца
толькі ты праходзіш яе панурыўшы зрок долу
ў свой офіс дастаеш зь бюро пісталет
і глядзіш што ён зараджаны
ты ня хочаш пасьля рабочага дня
пакідаць свой насядзелы да гемарою
фатэль
бо прыйдзецца зноў вяртацца ў вітальню
дзе прынята вітацца
Прыбіральня
мы з вамі атручаныя розным
я капіталізмам і рокам
вы лукашызмам і таматным сокам
які вам прадалі ў краме
сказалі што сьвежы
ваш страўнік гэта адчуў
Гасьцёўня
мы ў гэтым сьвеце на імгненьне
жыг — і няма
і як ты пражывеш гэты час залежыць
толькі ад цябе і ад абставінаў
найгоршае ў сьвеце адзінота
сябры сябрамі застаюцца
нават калі сьвет
навокал падае ў прорву
калі вочы АМОНаўца
безэмацыйна глядзяць
бы дулы аўтаматаў
ты адчуваеш рукі сяброў
у сваіх рукох
Заля
16-га сьвечка ў тваім акне
мне нагадала што ты блізка так
усяго праз вуліцу
і мы з табой ужо ня бачыліся
ад пачатку сьнежня
як шпарка бяжыць час
нібы машыны па гасьцінцу
але праз шкло я бачу
што мы разам
і гэта акрыляе
Маравія ўва Ўінстан-Салеме
яны размаўляюць на дзіўнай мове
гатуюць шыкоўнае печыва са смакам імберцу
апранаюць старажытныя строі
іх сьвет — лялечны тэатар для турыстаў
дзявочы рэлігійны каледж
царква тавэрна дзе ночыў джордж вашынгтон
Біблія на старанямецкай мове
разьбярня кузьня цясьлярня
ўсяго за дваццатку
лялькі цацкі печыва ПЕЧЫВА
аўтэнтыка ўсё сапраўднае
нават прыбіральня a-la в.Інчукі
вось толькі ў хляве схаваны
за дрывалкай
аўтамат з Coca-Cola
а ля старажытных хатак
прыпаркаваныя машыны
з паўночна-каралінскімі нумарамі
Ўінстан-Салем (ЗША)
Каментары