Лукашэнка падпісаў: больш за трох не збірацца

Аляксандр Лукашэнка падпісаў папраўкі ў закон аб масавых мерапрыемствах і шэраг законаў, якія рэгулююць грамадска-палітычную дзейнасць у краіне. Абодва дакументы падпісаныя беларускім кіраўніком 8 лістапада, 11 лістапада — зарэгістраваны ў Нацыянальным рэестры прававых актаў, паведамляе Нацыянальны прававы інтэрнэт-партал Беларусі.

Законапраекты былі прынятыя палатай прадстаўнікоў 3 кастрычніка, у першы ж дзень работы асенняй сесіі, прычым на закрытым пасяджэнні і адразу ў двух чытаннях. У адрозненне ад ніжняй палаты, савет рэспублікі абмяркоўваў іх у адкрытым фармаце.

Новы закон аб масавых мерапрыемствах робіць больш жорсткімі правілы іх правядзення.

Арганізацыя любога збору грамадзян павінна быць санкцыянаваная ўладамі — гэта датычыцца і флэшмобаў, і збору грамадзян, арганізаванага з выкарыстаннем інтэрнэту.

Да атрымання дазволу на правядзенне масавага мерапрыемства яго арганізатары не маюць права аб’яўляць, у тым ліку ў інтэрнэце, пра дату, час і месца яго правядзення. Акрамя таго, арганізатарамі не могуць быць асобы, якія дапусцілі парушэнне парадку правядзення такога мерапрыемства на працягу года з моманту накладання адміністрацыйнага спагнання.

Папраўкі ў заканадаўства, якое рэгулюе грамадска-палітычную дзейнасць,

робяць крымінальна каральным замежнае фінансаванне недзяржаўных арганізацый у парушэнне заканадаўства Беларусі.

Дакумент забараняе рэспубліканскім і мясцовым грамадскім аб’яднанням, іх саюзам захоўваць грашовыя сродкі, каштоўныя металы і іншыя каштоўнасці ў банках і нябанкаўскіх крэдытна-фінансавых арганізацыях, якія знаходзяцца на тэрыторыі замежных дзяржаў.

«Папраўкі ў закон аб масавых мерапрыемствах абсалютна своечасовыя. Яны скіраваныя не на парушэнне правоў і свабод грамадзян, а на іх выразнае і няўхільнае выкананне» — так пракаментаваў законапраект журналістам міністр унутраных спраў Анатоль Куляшоў.

Паводле яго слоў, у законапраекце ўсё ўзгоднена МУС з іншымі арганізацыямі дзяржаўнага кіравання.

Нагадаем, прыняцце гэтых законаў выклікала вялікі рэзананс у грамадстве. Лідары беларускіх НДА і праваабаронцы ў сумеснай заяве заклікалі ўлады адмяніць законапраект.

На іх думку, папраўкі ў закон «Аб масавых мерапрыемствах» «парушаюць правы грамадзян на мірныя сходы, гарантаваныя як Канстытуцыяй Беларусі, так і базавымі нормамі міжнароднага права, ўводзяць адміністрацыйную адказнасць грамадзян за нявінныя дзеянні і бяздзейнасці».

Не ўводзіць у дзеянне новыя законы афіцыйны Мінск таксама заклікалі прадстаўнікі міжнароднай грамадскасці, у тым ліку Еўрасаюз і АБСЕ. На іх думку, новаўвядзенні ў заканадаўства яшчэ больш абмяжуюць фундаментальныя права на свабоду сходаў і асацыяцый у Беларусі.

Аднак 28 кастрычніка Канстытуцыйны суд (КС) Беларусі, які разгледзеў законапраекты «у парадку абавязковага папярэдняга кантролю», прызнаў іх законнымі.

• 0
• 0
• 0
• 0
• 0
• 0
• 0
• 0