У Магілёве стаў працаваць адкрыты скаладром. Ён самы высокі ў Беларусі
У Магілёве на тэрыторыі СДЮШАР «Вікторыя» ўрачыста адкрылі новы скаладром вышынёй 17 метраў — гэта прыкладна як пяціпавярховы дом. Як сцвярджаюць гарадскія ўлады, гэта самы высокі скаладром пад адкрытым небам ва ўсёй краіне.
Аб'ект адпавядае алімпійскім стандартам і мае дзве трасы: адна на складанасць уздыму, а другая на хуткасць.
У Магілёве спартыўным скалалажаннем займаюцца каля 300 дзяцей. Аддзяленне гэтага віду спорту ў СДЮШАР «Вікторыя» працуе з верасня мінулага года.
Трэнерка Марыя Самсонава адзначыла, што з'яўленне скаладрома стала важнай падзеяй не толькі для Магілёва, але і для ўсёй Беларусі, бо спартсмены атрымалі сучасную пляцоўку для трэніровак.
На адкрыцці прайшлі спаборніцтвы з удзелам спартсменаў з Магілёва, Гомеля, Мар'інай Горкі, Шклова і Бабруйска. Новы аб'ект высока ацаніў і 17‑гадовы рэкардсмен Беларусі па хуткасным скалалажанні Ігнат Максімаўцоў, які мае нацыянальны рэкорд — 5,9 секунды.
Пакуль скаладром даступны толькі для спартсменаў і знаходзіцца на тэрыторыі спартыўнай школы пад аховай. Аднак улады прапрацоўваюць магчымасць адкрыць яго і для жыхароў ды гасцей горада пад наглядам інструктараў.
Адкрыццё скаладрома стала адным з мерапрыемстваў да Дня горада Магілёва. Таксама тут у найбліжэйшыя дні плануецца адкрыццё святломузычнага фантана на рацэ Дубравенка, правядзенне гарадскіх фестывальных мерапрыемстваў і вялікага канцэрта з феерверкам.
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3523
Каментары