Былая прэс-сакратарка Зяленскага пайшла да Такера і пераказала тэзісы расійскай прапаганды
Юлія Мендэль заявіла, што ў 2022 годзе ўкраінскі лідар нібыта быў гатовы аддаць Данбас Расіі. У Офісе прэзідэнта Украіны Мендэль ахарактарызавалі як асобу, што «даўно не ў сабе».
Юлія Мендэль, былая прэс-сакратарка Уладзіміра Зяленскага (з чэрвеня 2019 да ліпеня 2021 года), пайшла ў эфір Такера Карлсана — амерыканскага вядучага, вядомага сваёй прарасійскай рыторыкай і інтэрв’ю з Пуціным і Дугіным.
Адной з самых рэзанансных стала заява Мендэль, што ў 2022 годзе ўкраінскі лідар нібыта быў гатовы аддаць Данбас Расіі дзеля міру. Мендэль сцвярджала, што падчас перамоў у Стамбуле вясной 2022 года ўкраінская дэлегацыя нібыта пагадзілася на ўсе патрабаванні Крамля. Яна спаслалася на канфідэнцыйныя размовы з неназванымі ўдзельнікамі сустрэчы, якія нібыта пацвердзілі асабістую згоду Зяленскага на тэрытарыяльныя саступкі.
У Офісе прэзідэнта Украіны адрэагавалі на выпад былой супрацоўніцы вельмі рэзка. Гэтую інфармацыю там назвалі абсурднай, а саму Мендэль характарызавалі як асобу, якая «даўно не ў сабе». У ОП падкрэслілі, што Мендэль на момант перамоў ужо не працавала ў дзяржаўных структурах і не мела ніякага дачынення да перамоўнага працэсу ці прыняцця рашэнняў.
Прадстаўнікі прэзідэнта Украіны адзначылі, што каментаваць словы чалавека, які знаходзіцца ў такім псіхаэмацыйным стане, «несур’ёзна».
Таксама Юлія Мендэль агучвала шматлікія тэзісы, якія паўтараюць наратывы расійскай прапаганды. Паводле яе слоў, Зяленскі «эмацыйна некантраляваны», «не мае эмпатыі, а толькі грае яе», ён «неверагодны акцёр, гульня якога пазбаўленая зместу».
Падчас працы Мендэль у Офісе прэзідэнта яна нібыта неаднаразова чула ад Зяленскага, што «Украіна не гатовая да дэмакратыі», а «дыктатура — гэта парадак».
Былая прэс-сакратарка прэзідэнта кажа, што Зяленскі «свядома зацягвае вайну», каб утрымацца пры ўладзе, бо для яго яе завяршэнне будзе азначаць «палітычнае самагубства».
Мендэль паставіла знак роўнасці паміж прэзідэнтамі Расіі і Украіны.
«Мы бачым Пуціна як зло, але Зяленскі — таксама зло. Проста схаванае. На камеру ён грае плюшавага мядзведзіка, але калі святло гасне, ён ператвараецца ў грызлі, які нішчыць людзей».
Гэта далёка не першы выпадак скандалаў з Мендэль. Раней яна ўжо прыцягвала ўвагу СМІ гісторыямі пра ўнутраную кухню ўкраінскай улады. Яна сцвярджала, што кіраўнік Офіса прэзідэнта Андрэй Ярмак нібыта практыкуе магію, наведвае могілкі і выкарыстоўвае «мёртвую ваду». Яна называла Ермака «вельмі небяспечным чалавекам» і заяўляла пра пагрозу сваёй бяспецы.
Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?15
Каментары
Я не кажу правільна гэта было ці не, але самі удзельнікі гэтых перамоваў (той жа Арахамія) гэта пацвяржалі