Жанчына з Гомеля нагаварыла праклёнаў па тэлефоне на 450 рублёў
Жыхарка Гомеля будзе вымушаная заплаціць штраф сумай 450 рублёў за абразы і праклёны, выказаныя па тэлефоне на адрас судовага выканаўцы. Пра гэты выпадак паведамілі ў Галоўным упраўленні юстыцыі Гомельскага аблвыканкама.
Як стала вядома, 35‑гадовая жанчына працяглы час ухілялася ад выплаты аўтакрэдыту. Банк звярнуўся ў суд, і ў выніку разгляду справы аўтамабіль, які знаходзіўся ў закладзе, быў арыштаваны і прададзены. Аднак атрыманых грошай не хапіла, каб цалкам кампенсаваць запазычанасць.
Пасля гэтага судовая выканаўца наклала спагнанне на банкаўскі рахунак гамяльчанкі, каб атрымаць астатнюю суму доўгу. У адказ жанчына патэлефанавала ў аддзел прымусовага выканання і размова перайшла ў канфлікт: яна дапусціла грубыя абразы і праклёны, закрануўшы нават сямейнікаў супрацоўніцы.
Тэлефонны званок быў запісаны, і гэта стала падставай для прыцягнення жанчыны да адміністрацыйнай адказнасці. Суд прызначыў ёй штраф сумай 10 базавых адзінак за абразу дзяржаўнай службовай асобы пры выкананні службовых абавязкаў. У судзе гамяльчанка прызнала сваю віну і патлумачыла свае паводзіны раптоўным эмацыйным зрывам.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары