Супрацьстаянне ЗША і Венесуэлы: авіяносная група амерыканскага ВМФ прыбыла ў Карыбскае мора
Авіаносная група ЗША на чале з новым і найбуйнейшым авіаносцам у свеце «Джэральд Форд» прыбыла ў Карыбскае мора. Пра гэта абвясціла камандаванне амерыканскага флоту. Дональд Трамп, які аддаў загад аб перадыслакацыі групы, кажа, што робіць гэта ў межах барацьбы з наркатрафікам з Венесуэлы, піша Бі-бі-сі.
Пра загад Трампа Пентагон абвясціў 24 кастрычніка. У той час авіяносная група знаходзілася ля еўрапейскіх берагоў, у Паўночным моры.
Флот і авіяцыя ЗША ўжо некалькі месяцаў наносяць удары па малых суднах у Карыбскім моры і Ціхім акіяне, якія, як сцвярджае кіраўніцтва ЗША, перавозяць наркотыкі. Яны нанеслі ўжо не менш за 19 такіх удараў, у выніку якіх былі забітыя як мінімум 76 чалавек.
Венесуэльскі лідар, левы сацыяліст Нікалас Мадура і іншыя прадстаўнікі кіраўніцтва краіны абвінавачваюць ЗША ў тым, што яны штучна ствараюць крызіс з мэтай адхілення іх ад улады.
Амерыканскі флот заявіў, што 11 лістапада авіяносная група ўвайшла ў зону адказнасці Паўднёвага камандавання ЗША, якая ўключае Карыбскае мора і краіны Лацінскай Амерыкі.
На «Джэральдзе Фордзе» базіруюцца некалькі дзясяткаў баявых самалётаў. Яго экіпаж разам з лётчыкамі і лётным тэхнічным персаналам складае больш за 4,5 тысячы чалавек. Авіяносец суправаджаюць ракетныя эсмінцы і іншыя баявыя і дапаможныя караблі.
Як заявіў прэс-сакратар Пентагона Шон Парнэл, прыбыццё авіяноснай групы ў Карыбскае мора дазволіць ЗША больш эфектыўна адсочваць і спыняць наркатрафік.
Да гэтага ўлады ЗША ўжо адправілі ў раён Венесуэлы значную ваенную сілу: 10 знішчальнікаў F-35 былі дыслакаваныя ў суседняй Пуэрта-Рыка, акрамя таго, у рэгіёне ўжо знаходзяцца атамная падводная лодка і восем ваенных караблёў: тры эскадраныя мінаносцы, крэйсер, карабель берагавой аховы і тры дэсантныя караблі.
Разам з авіяноснай групай, якая прыбыла, яны складуць групоўку, якую ЗША не збіралі ля берагоў Лацінскай Амерыкі ўжо дзясяткі гадоў.
Удары наносяцца і з іншага боку кантынента: у пачатку гэтага тыдня ЗША абвясцілі аб двух новых ударах па меркаваных суднах наркагандляроў у Ціхім акіяне і гібелі шасці чалавек.
Гэтыя ўдары па катарах і баркасах прывялі да росту напружанасці ў адносінах ЗША не толькі з Венесуэлай, але і з суседняй Калумбіяй. Акрамя таго, многія ў рэгіёне і па-за ім абвінавачваюць ЗША ў тым, што яны гэтымі ўдарамі парушаюць правы чалавека і міжнароднае права.
У пачатку лістапада, адказваючы ў інтэрв'ю амерыканскага партнёра Бі-бі-сі, тэлекампаніі CBS, на пытанне аб абвінавачваннях у падрыхтоўцы ўдараў па Венесуэле, Дональд Трамп адказаў: «Я не схільны казаць, што я б гэта зрабіў. Я не збіраюся казаць вам, што я збіраюся зрабіць з Венесуэлай, незалежна ад таго збіраюся я гэта зрабіць ці не».
У тым жа інтэрв'ю CBS Трамп паўтарыў сваё сцвярджэнне, што «кожнае з гэтых знішчаных суднаў забівае наркотыкамі 25 тысяч чалавек і знішчае сем'і па ўсёй нашай краіне».
Цяпер чытаюць
Ніводзін лукашэнкаўскі СМІ і канал не выкарыстаў слова «рэтранслятары». Што гэта можа азначаць?26
Каментары