Пажылыя мінчане змогуць танцаваць на легендарнай пляцоўцы ў парку Чалюскінцаў бясплатна
Танцавальныя вечары пад адкрытым небам у сталічным парку стартуюць у сярэдзіне мая.
Старыя мінчане змогуць танцаваць на пляцоўцы ў парку Чалюскінцаў бясплатна. Такое рашэнне прыняў Мінгарвыканкам.
Здаецца, гаворка ідзе пра мужчын і жанчын пенсійнага ўзросту. Намеснік старшыні Мінгарвыканкама Андрэй Стрыжэльскі назваў гэта рашэнне падарункам ад горада старым людзям, пішуць «Мінск-Навіны».
«Танцпляцоўка ў парку імя Чалюскінцаў карыстаецца нязменнай папулярнасцю ў прадстаўнікоў старэйшага пакалення. У год 80-годдзя Перамогі ў Вялікай Айчыннай вайне горад робіць мінчанам элегантнага ўзросту своеасаблівы падарунак: з сярэдзіны мая яны змогуць наведваць танцавальныя вечары для адкрытым небам бясплатна. Усе выдаткі бярэ на сябе горад», — адзначыў Стрыжэльскі.
Ён дадаў, што ў сярэдзіне мая ў кожным раёне сталіцы адчыняцца танцавальныя пляцоўкі. Яны будуць працаваць рэгулярна ўвесь цёплы сезон. Танцавальныя вечары запланаваны і ў гарадскіх дамах культуры.
Танцпляцоўка ў Парку Чалюскінцаў, або, як яе называюць у народзе, «Дошкі», звычайна працуе па вечарах у выходныя і святочныя дні. У мінулым годзе білет на праграму «Для тых, хто малады душой» каштаваў 4 рублі 80 капеек. За рубель можна было замовіць мелодыю.
Каментары