У Мінскай вобласці — выбух атручванняў сурагатным алкаголем. У гэтым годзе ўжо 4 чалавекі загінулі ад яго
Мінская вобласць сутыкнулася з хваляй атручванняў тэхнічнымі вадкасцямі, колькасць такіх выпадкаў павялічылася, піша СК. За 2,5 месяцы 2025 года ад паленай гарэлкі тут загінулі 4 чалавекі.
У Барысаўскім раёне двое мужчын памерлі пасля ўжывання вадкасці для ачысткі шкла, якую памылкова прынялі за спіртное.
Паводле папярэдняй інфармацыі, 18 студзеня 39-гадовы жыхар вёскі Зэмбін Барысаўскага раёна, выпіў дома паўлітра вадкасці, прызначанай для ачысткі аўтамабільнага шкла.
А днём 14 студзеня з вострым атручваннем у бальніцу паступіў 62-гадовы жыхар Барысава. Ён, піша СК, пераблытаў шчаўевую кіслату з гарэлкай і выпіў яе.
Крыху больш пашанцавала жыхару Мінскага раёна. У бальніцу брыгадай хуткай дапамогі 25 студзеня быў дастаўлены 48-гадовы жыхар гарадскога пасёлка Мачулішчы з атручваннем. Аналіз крыві паказаў наяўнасць ізапрапілавага спірту.
Як высветлілі следчыя, пасля сваркі з жонкай мужчына пайшоў у свой гараж, дзе пачаў ужываць спіртное з бутэлькі, што захоўвалася ў яго ў ёмістасці з-пад тармазной вадкасці.
Па словах пацярпелага, побач стаяла аналагічная бутэлька з сапраўднай тармазной вадкасцю. Па няўважлівасці ён выпіў каля 100 мл атрутнага рэчыва, пасля чаго адчуў сябе дрэнна і звярнуўся па медыцынскую дапамогу. Цяпер ён знаходзіцца пад наглядам медыкаў.
Падобны, але ўжо смяротны інцыдэнт адбыўся ў вёсцы Ашмянцы. У бальніцы 19 лютага памёр 60-гадовы жыхар Мінскага раёна, шпіталізаваны напярэдадні з атручваннем сурагатамі алкаголю.
Па ўсіх названых фактах раённымі падраздзяленнямі праводзяцца праверкі.
Учора Мінск зноў затапіла. Чаму сталіца не гатовая да дажджоў?4
Каментары