Карціну Марка Шагала выставілі на аўкцыён у Празе. Стартавая цана немалая
Як пярліну свайго восеньскага аўкцыёна выстаўляе Шагала чэшская галерэя Адольфа Лоаса — Adolf Loos Apartment and Gallery. Карціна створаная ў 1976 годзе і называецца Maternité sur fond bleu («Мацярынства на сінім фоне»), піша «Радыё Свабода».
У цэнтры кампазіцыі выява маці, якая трымае на руках дзіця, мякка нахіліўшы да яго галаву. За імі, нібы ў сінім мроіве ўспамінаў, пазнавальны антураж старой беларускай правінцыі.
«Гэтая карціна ўвасабляе паэтычную візуальную мову Шагала, якая адлюстроўвае гісторыю яго ўласнай сям’і і кахання, — гаворыцца ў каталогу аўкцыёну. — Кампазіцыя мары прыгадвае як дэталі асабістай і сямейнай гісторыі мастака, так і рысы ўсходнееўрапейскага фальклору. У карціне заўважныя матывы вясковага жыцця, выявы жывёл, галу́бкі, якая дадае твору міралюбівую атмасферу».
Як паведаміў дырэктар галерэі Уладзімір Лэкеш, твор да самай смерці мастака знаходзіўся ў яго дома, потым трапіў у прыватную калекцыю. Менавіта з гэтай заходнееўрапейскай калекцыі галерэя атрымала твор, на аўкцыёне ён будзе ўпершыню.
Стартавую цану паставілі ў 12 мільёнаў чэшскіх крон (480 тысяч еўра). Да самай вялікай сумы, прапанаванай пераможцам, трэба будзе дадаць і аўкцыённую правізію (21 працэнт).
Аўкцыён адбудзецца ў Празе 12 лістапада і будзе непублічным. Удзел у ім могуць браць толькі тыя, хто папярэдне зарэгістраваўся. Для беларусаў Чэхіі, нават калі яны і не збіраюцца пазмагацца за набыццё твора земляка, ёсць прынамсі шанец яго пабачыць. Перад аўкцыёнам галерэя дае магчымасць пазнаёміцца з творамі ў выставачнай залі Expo 58 ART (ад 21 кастрычніка да 11 лістапада).
Знакавых твораў Марка Шагала ў Беларусі, дзе ён нарадзіўся, даволі мала. У свой час беларускі бізнэс рабіў спробы вяртаць іх на радзіму.
«Белгазпрамбанк» з ініцыятывы Віктара Бабарыкі купіў на аўкцыёне «Сотбіс» для сваёй карпаратыўнай калекцыі дзясяткі твораў мастакоў парыжскай школы, ураджэнцаў Беларусі. Але гэтую калекцыю далучылі да крымінальнай справы Віктара Бабарыкі; што з ёй цяпер, невядома.
«Рэйдарскім захопам» называюць мастацтвазнаўцы далучэнне да крымінальнай справы карпаратыўнай калекцыі карцін, што належыць «Белгазпрамбанку».
За мяжой творы Марка Шагала (1887—1985) можна пабачыць у Нацыянальным музеі Марка Шагала ў французскай Ніцы, у французскім Цэнтры Пампіду, Нацыянальнай мастацкай галерэі ў Вашынгтоне, Музеі сучаснага мастацтва ў Нью Ёрку (MоMA), Інстытуце мастацтва ў Чыкага, сетцы брытанскіх музеяў Тate, Рускім музеі ў Санкт-Пецярбургу ці Траццякоўскай галерэі ў Маскве.
Над шэрым кардыналам Нацбанка згусціліся хмары? Затрымалі яго сябра, былога выканаўчага дырэктара Банка развіцця7
Каментары