У Брэсце маці траіх дзяцей далі «хатнюю хімію» за «садзейнічанне экстрэмісцкай дзейнасці»
У віну паставілі тры эпізоды.
Брэсцкі абласны суд 10 красавіка агучыў прысуд па крымінальнай справе 31-гадовай жыхаркі Баранавіч Анастасіі Падгайскай, якая размяшчала ў тэлеграм-каналах звесткі аб становішчы ў рэгіёнах Расіі і Беларусі. Яе абвінавацілі ў садзейнічанні экстрэмісцкай дзейнасці (ч. 1 арт. 361-4 КК), піша «Вясна».
Справу разглядае суддзя Андрэй Васілюк, дзяржабвінаваўца — пракурор Аляксандр Бацюшко.
Маці траіх дзяцей затрымалі пры канцы 2022 года, і да суда яна была пад хатнім арыштам.
Па матэрыялах следства, Падгайская ў кастрычніку 2022 года нібыта неаднаразова перасылала фота— і відэафайлы з тэкставымі паведамленнямі ў бот дэструктыўнага Telegram-канала экстрэмісцкага фармавання.
Інфармацыя, адпраўленая ёй, змяшчала звесткі аб абстаноўцы ў рэгіёнах Расійскай Федэрацыі і Рэспублікі Беларусь, а таксама аб планавых мерапрыемствах на агульнавайсковых палігонах.
Так, 17 кастрычніка 2022 года быў адпраўлены скрыншот са школьнага бацькоўскага вайбер-чата з папярэджаннем аб ваенных вучэннях пад Баранавічамі.
Тыднем раней, 8 кастрычніка 2022 (у дзень выбуху на Крымскім мосце) у чат «Рэальная Беларусь» быў дасланы скрыншот з чата інжынераў-тэсціроўшчыкаў, на якім відаць рэакцыю расійскіх удзельнікаў чата. Да гэтага ішоў уласны каментарый: «Вучуся на тэсціроўшчыка. Нават тут пасля бавоўны неспакойна».
А 5 кастрычніка 2022 года ў «Рэальную Беларусь» было даслана 2 фатаграфіі з дворнікам, на адным здымку дворнік паставіў інструмент да чужога аўтамабіля. Да фота быў тэкст: «Альбо дворнікі багатыя, альбо страх страцілі».
Дзяржабвінаваўца запрасіў 6 красавіка для Падгайскай тры гады абмежавання волі без накіравання ў ПУАТ («хатняя хімія»).
Суд прызнаў яе вінаватай і пакараў тэрмінам, які прапанаваў пракурор: тры гады «хатняй хіміі».
Цяпер чытаюць
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў26
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1111
Каментары