Кіраўнік МЗС Венгрыі Петэр Сіярта расказаў журналістам пра мэту свайго візіту ў Мінск 13 лютага, паведамляе «Радыё Свабода». Паводле яго, ён проста перадаў беларускаму боку просьбу не рабіць захадаў, якія могуць прывесці да зацягвання або пашырэння вайны ва Украіне.
Таксама Сіярта назваў фантазіямі гіпотэзы, што ў Мінску ён мог сустракацца з прадстаўнікамі Расіі. Маўляў, калі б яму трэба было нешта абмеркаваць з расіянамі, то ён паехаў бы не ў Мінск, а ў Маскву.
«Ні я, ні хто-небудзь з членаў маёй дэлегацыі не вёў перамовы ні з кім, акрамя беларускіх перамоўнікаў», — заявіў венгерскі міністр.
Петэру Сіярта, як і прэм’ер-міністру Венгрыі Віктару Орбану, часта закідаюць празмерную супрацу з Масквой.
Петэр Сіярта прылятаў у Мінск 13 лютага. Папярэдні раз прадстаўнік Венгрыі, сам прэм'ер Віктар Орбан, пабываў у Беларусі 5 чэрвеня 2020 года, яшчэ да выбараў, пратэстаў і рэпрэсій. Пасля таго прадстаўнікі краін Еўрасаюза на ўзроўні прэм’ераў ці кіраўнікоў МЗС у Беларусь не прыязджалі.
Каментары