Жонка вядомага беларускага хакеіста запусціла дабрачынны фонд для хворых на рак
Надзея Мялешка — папулярная беларуская блогерка, а таксама жонка былога хакеіста беларускай зборнай Дзмітрыя Мялешкі. Больш за два гады яна змагаецца з ракам грудзей. Цяпер Надзея запускае дабрачынны фонд у падтрымку анкахворых.
Арганізацыя беларускі будзе насіць назву «Фонд Надзеі». Менш чым за суткі на старонку фонду ўжо падпісаліся амаль 17 тысяч чалавек.
Як піша Надзея, ужо цяпер анкахворыя могуць разлічваць на інфармацыйную падтрымку ад арганізацыі: пачуць пра правільнае харчаванне пры сваёй хваробе, атрымаць парады ад псіхолага і рэкамендацыі ад еўрапейскіх медыкаў. Калі адпаведныя дакументы будуць аформленыя, фонд будзе дапамагаць і з аплатай рахункаў за лячэнне дзецям і дарослым, якія хварэюць на рак.
Мялешка тлумачыць, што важнай матывацыяй пра стварэнні фонду для яе стаў уласны вопыт:
«У дзень, калі я пачула ад дактароў у Беларусі, што ў мяне рак грудзей, я была глыбока ўзрушаная, напужаная, не здольная прымаць ніякія рашэнні. Я думала, гэта канец… Я хачу працягнуць руку кожнаму, хто цяпер пражывае барацьбу з ракам. Хто толькі даведаўся пра дыягназ, хто адчаяўся і вельмі баіцца, хто не ведае, куды бегчы і што рабіць».
Муж Надзеі Дзмітрый Мялешка — былы форвард беларускай зборнай па хакеі і мінскага «Дынама», а таксама экс-гулец хакейнай каманды Аляксандра Лукашэнкі. Цяпер Дзмітрый шмат у чым падтрымлівае сваю жонку, якая больш за два гады змагаецца з анкалогіяй.
Адна з вядомых беларускіх блогерак, Надзея Мялешка зарэгістравала акаўнт у Instagram у 2012 годзе. Спачатку гэта была асабістая старонка, а потым уладальнікі камерцыйных акаўнтаў, якім спадабаўся акаўнт Надзеі, сталі звяртацца да яе з просьбай весці і іх старонкі. Паступова з гэтага вырас і паспяховы ўласны блог з больш чым 412 тысячамі падпісчыкаў, і шэраг курсаў у вобласці SMM.
У студзені 2020 года ў Надзеі Мялешкі выявілі рак грудзей.
«30 снежня я намацала ўшчыльненне ў грудзях. Панікаваць не стала, бо тры месяцы таму была на УГД і ўсё было добра. Пасля НГ адразу ж пабегла правярацца.
8 студзеня я даведалася, што ў мяне рак грудзей. Трэцяя стадыя.
Чаму не было відаць на УГД? Я правяралася кожныя паўгода. Бо гэты від пухліны мае агрэсіўны, хуткі характар. Ён, гад, паспеў пракрасціся ў лімфавузлы.
Як я? Ужо нармальна. Па жыцці я аптыміст і заўсёды веру толькі ў лепшае! Настроена толькі на станоўчы вынік!» — пісала яна тады.
У ліпені таго ж года хвароба ў блогеркі перайшла ў стадыю рэмісіі. Але ў сакавіку 2021-га Надзея паведаміла, што хвароба вярнулася, дактары знайшлі ў яе метастазы ў печані. Жанчына працягвае сваё лячэнне ў Германіі, куды пераехала з сям'ёй.
«Баліць — трындзец як». Ваданосава распавяла пра аперацыю і цяперашнюю рэабілітацыю
-
Літва палічыла фігуранта расследавання «Нашай Нівы» Скіндзерава пагрозай нацыянальнай бяспецы і збіраецца пазбавіць статусу ўцекача
-
У прыгранічных Лельчыцах вучыліся разгортваць рухомыя пункты харчавання і рэчавага забеспячэння
-
У Віцебску на пешаходным пераходзе паставілі незвычайныя слупкі. Як яны працуюць?
Зяленскі назваў, якія рэтранслятары на мяжы і беларускія прадпрыемствы хвалююць Украіну36
Каментары