Два экзамены замест чатырох. Што зменіцца ў выпускных іспытах у школах з наступнага года
Учора Лукашэнка зацвердзіў новую рэдакцыю правілаў прыёму ў ВНУ і ўстановы сярэдняй спецыяльнай адукацыі. Правілы пачнуць дзейнічаць праз год, з 2023-га. Змены тычацца, у тым ліку, і выпускных іспытаў у школах.
Так, выпускнікі ўстаноў агульнай сярэдняй адукацыі будуць здаваць выніковыя іспыты па адной з дзяржаўных моў і матэматыцы ў форме цэнтралізаванага экзамена.
Цяпер у 11-м класе здаюць матэматыку, беларускую або рускую мовы (на выбар), а таксама замежную мову і гісторыю Беларусі.
У сувязі з гэтым устаноўлена, што паступленне ў ВНУ з 2023 года будзе ажыццяўляцца на падставе сертыфікатаў цэнтралізаванага экзамена, вынікаў цэнтралізаванага тэставання (па профільных прадметах), а таксама сярэдняга бала дакумента аб адукацыі, паведамляе «Звязда».
Таксама ў новых рэдакцыях Кодэкса і Правілаў прыёму істотна пашыраюцца магчымасці мэтавай падрыхтоўкі спецыялістаў як формы дзяржаўнага заказу. Калі раней яна распаўсюджвалася толькі на пэўныя населеныя пункты (чарнобыльскія, сельскія рэгіёны, гарады з насельніцтвам да 20 тысяч), то цяпер такі дагавор можа заключыць арганізацыя-заказчык кадраў, якая знаходзіцца ў любым пункце Беларусі.
Пры гэтым плануецца, што для паступлення на ўмовах мэтавай падрыхтоўкі з 2023 года абітурыент будзе здаваць унутраны ўступны іспыт (вусны экзамен), які дазволіць «убачыць» і правесці адбор матываваных абітурыентаў.
У 2023 годзе пачнуць дзейнічаць нормы аб павелічэнні ва ўстановах вышэйшай адукацыі колькасці бюджэтных месцаў на ўмовах мэтавай падрыхтоўкі спецыялістаў па сельскагаспадарчых спецыяльнасцях — да 70 працэнтаў ад кантрольных лічбаў прыёму, па медыцынскіх — да 80 працэнтаў, па іншых спецыяльнасцях — да 60 працэнтаў.
У мэтах адбору найбольш падрыхтаваных, матываваных абітурыентаў прадугледжваецца шэраг ільгот: з 2022 года — для выпускнікоў спартыўна-педагагічных і ваенна-патрыятычных класаў, а з 2023 года — для пераможцаў Рэспубліканскіх і ўнутрыўніверсітэцкіх алімпіяд, Нацыянальнага дзіцячага тэхнапарку.
Паступленне ў Акадэмію кіравання з 2023 года будзе ажыццяўляцца ў асаблівым парадку.
Пры паступленні ва ўстановы сярэдняй спецыяльнай адукацыі залічэнне абітурыентаў будзе ажыццяўляцца па конкурсе сярэдняга бала дакумента аб адукацыі.
Чытайце таксама:
Дзяцей абавяжуць вучыцца ў школе 11 год. Лукашэнка падпісаў кодэкс аб адукацыі, расказваем, што зменіцца
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3434
Каментары