Мінск падрыхтаваў меры ў адказ на новыя санкцыі ЕС, некаторыя з іх даволі адчувальныя. Заява прыводзіцца на сайце МЗС
— Зусім дурное, недальнабачнае і ва ўсіх адносінах дзікае рашэнне, якое прывядзе толькі да негатыўных наступстваў, у тым ліку і для тых высокіх мэтаў і ідэалаў, за якія нібыта так радзее ЕС, — пракаментаваў увядзенне санкцый прэс-сакратар МЗС Беларусі Анатоль Глаз.
«Таксама няма ніякіх ілюзій, што гэта прымітыўны састаўны элемент шырокамаштабнай мэтанакіраванай кампаніі масіраванага ціску на нашу краіну. Звычайная спроба вонкавага ўмяшання ва ўнутраныя справы незалежнай дзяржавы, аб падтрымцы суверэнітэту якой так любяць размаўляць нашы еўрапейскія партнёры. Таксама ўжо няма сумневаў, што на справе гэтыя крокі накіраваныя і супраць інтарэсаў простых беларусаў».
Па словах Глаза, беларускі бок падрыхтаваў меры ў адказ.
— Некаторыя з іх даволі адчувальныя. Хай асобныя еўрапейскія апаненты потым не дзівяцца і не спрабуюць перакладаць віну. Усе гранічна ясна.
У МЗС распавялі, што будуць прыняты дзеянні па абароне правоў і законных інтарэсаў беларускіх грамадзян і юрыдычных асоб.
— Усім будзе аказана садзейнічанне. Бо прынятыя рашэнні ў шэрагу выпадкаў не тое, што абсурдныя, але, я б сказаў, проста дыскрэдытуюць здаровы сэнс. Ну, у чым правініліся перад Еўрасаюзам тысячы рабочых прадпрыемстваў, якія трапілі пад санкцыі? Разлічваем, што не толькі беларускія прафсаюзы, але і Міжнародная федэрацыя прафсаюзаў, а таксама іншыя профільныя арганізацыі звернуць на гэта пільную ўвагу. Сітуацыя зусім відавочная. Або, напрыклад, чым так напалохаў ЕС беларускі доктар, анколаг, які ўсё жыццё ратаваў жыцці людзей, былы міністр аховы здароўя?
Гэта пабочны ўплыў ад фантастыкі, калі ў любым дзеянні трэба прызначыць «доктара Зло»?
Мы адзначылі і дыскрымінацыю беларускага журналіста толькі за тое, што ён агучваў меркаванне, якое не падабаецца і адрозніваецца ад пазіцыі ЕС. Спадзяемся, што міжнародныя журналісцкія арганізацыі і аб'яднанні не дзеляць сваіх калегаў на дрэнных і добрых, будуць прынцыповыя і таксама, як і ў іншых выпадках, ўступяцца ў яго абарону. Ёсць адпаведныя інструменты і ў нас, яны будуць задзейнічаны.
Чым не дагадзіў Еўрасаюзу беларускі IT-сектар таксама незразумела.
Але зразумела іншае: ініцыятары падобных рашэнняў павінны панесці адказнасць за канкрэтную нанесеную шкоду, у тым ліку эканамічную. Гэты нахабны валюнтарызм еўрабюракратыі калісьці павінен спыніцца. Мы пастараемся зрабіць так, каб не было як у мінулы раз — пастановы прызналі незаконнымі, але адказных не знайшлі — сказана ў паведамленні МЗС.
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай15
Каментары