«У яго абвостранае пачуццё справядлівасці»: капітана міліцыі з Наваполацка затрымалі, як толькі ён напісаў рапарт
Капітана міліцыі з Наваполацка Ягора Емяльянава затрымалі пасля таго, як ён выклаў у сацсеткі фота пасведчання і пагонаў з подпісам: «17 гадоў службы скончаны. Маё сумленне чыстае. Міліцыя з народам».
Інфармацыю пра затрыманне Нашай Ніве пацвердзіла жонка Ягора Емяльянава Марына.
«Яму патэлефанавалі з працы. Сказалі, што трэба падысці падпісаць дакументы, акт прыёму-перадачы форменнай вопраткі. Аператыўна закрыць пытанне. Мы з ім былі на сувязі, планавалі ў гэты дзень сямейную вячэру. У 17:55 я яму тэлефанавала, ён яшчэ быў у аддзеле, афармляў дакументы. У 19:55 я патэлефанавала зноў, хацела дамовіцца, хто забярэ нашу малодшую дачку, ёй тры гады. Ён паведаміў, што затрыманы. За што? Сказаў, што пакуль не ведае», — распавядае Марына.
Па тых папярэдніх дадзеных, якімі валодае Марына, муж праходзіць па артыкуле 23.34 — парушэнне парадку арганізацыі або правядзення масавых мерапрыемстваў. У ГУУС падрабязнасцяў не паведамляюць.
«Ён чалавек з абвостраным пачуццём справядлівасці. Непрыемная сітуацыя ў краіне, ён не хацеў удзельнічаць. Калі з'явілася рызыка ўвядзення надзвычайнага становішча, мы пагаварылі і вырашылі, што прыйшоў час звальняцца. Ён адразу ж паехаў», — адзначае Марына.
Судовае пасяджэнне запланавана на сёння 13 жніўня.
Цяпер чытаюць
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»15
Каментары