Уладзіміра Япрынцава вызвалілі ў зале суда, яго сустрэлі апладысментамі, а жонка біла пацярпелага сумкай
Сёння ў судзе Цэнтральнага раёна Мінска абвясцілі прысуд Уладзіміру і Казбеку Япрынцавым, а таксама Аляксандру Арабяну. Япрынцаў-старэйшы вызвалены ў зале суда, яго сустрэлі апладысментамі. Казбек Япрынцаў і Аляксандр Арабян асуджаныя на восем гадоў зняволення.
У судзе Цэнтральнага раёна Мінска абвясцілі прысуд бізнэсмэнам бацьку і сыну Уладзіміру і Казбеку Япрынцавым.
Пацярпелыя па справе настаялі, каб прысуд быў зачытаны цалкам, і яго абвяшчэнне зацягнулася амаль на тры гадзіны.
Такім чынам, Уладзіміру Япрынцаву далі штраф у 500 базавых велічыняў (арт. 405 ч.1 КК «Укрывальніцтва злачынства»), што раўняецца 10,5 тыс. рублёў (або каля 5,2 тыс. даляраў). Уладзіміру вяртаецца яго канфіскаваная падчас следства маёмасць.
Казбек Япрынцаў і Аляксандр Арабян асуджаныя на 8 гадоў зняволення (арт. 209, ч. 4 «Махлярства»). У Япрынцава-малодшага і Арабяна павінна быць канфіскаваная маёмасць.
«Забойцам даюць толькі 7 гадоў, а тут 8», — сустракае прысуд жонка Казбека.
Уладзімір Япрынцаў вызвалены ў зале суда, яго сустрэлі апладысментамі пару соцен чалавек. Сапраўды, ахвотных падтрымаць зняволенага бізнэсоўца было вельмі шмат.
Тым часам яго жонка Святлана ўдарыла сумкай прадстаўніка пацярпелага боку. «Вам лягчэй стала, што майго сына пасадзілі на 8 гадоў?» — пыталася яна.
Эмоцыі зашквальвалі. Дужы мужчына з іменем Магамед ледзьве не пабіўся з прадстаўнікамі СМІ.
З прэсай Уладзімір Япрынцаў размаўляць адмовіўся. Паабяцаў зрабіць гэта пазней. Сказаў толькі, што без падтрымкі сяброў яму было б цяжка.
Япрынцаў з'ехаў на чорным джыпе дадому, а вось многія сваякі яшчэ засталіся ў дворыка суда чакаць этапавання Казбека і Арабяна ў СІЗА.
***
11 жніўня дзяржабвінаваўца Юрый Шарснёў папрасіў суд перакваліфікаваць абвінавачанне Уладзіміру Япрынцаву на ч. 1 арт. 405 КК — укрывальніцтва злачынства (караецца штрафам, або папраўчымі работамі на тэрмін да двух гадоў, або арыштам на тэрмін да трох месяцаў). На думку дзяржабвінаваўцы, Япрынцаў-старэйшы ведаў пра злачынныя дзеянні сына і яго партнёраў, абяцаў ім укрывальніцтва і не паведаміў пра гэтыя факты ў праваахоўныя органы.
На падставе гэтага пракурор папрасіў суд прызначыць Уладзіміру Япрынцаву штраф у тысячу базавых велічынь (21 тысяча рублёў, або прыблізна 10,5 тысячы долараў).
Цяпер чытаюць
Шэсць фактаў пра Андрэя Шведа — былога генпракурора, які цяпер стаў старшынёй Вярхоўнага суда4
Каментары