Яны патрабавалі адмяніць закон пра замежных агентаў.
Некалькі тысяч навукоўцаў узялі ўдзел у антыпуцінскім мітынгу ў Маскве. Нагодай для пратэсту стала прызнанне «замежным агентам» фонду «Дынастыя», які фінансаваў навуковыя даследаванні.
Але гаворка на мітынгу пайшла шырэйшая. Акадэмік Захараў прывёў прыклад: сярэдні заробак навукоўца ў Расіі ўтрая меншы, чым у польскага навукоўца. У той жа час сярэдні заробак расійскага чыноўніка ўдвая большы, чым у яго польскага калегі.
«Упершыню ў нашай гісторыі жаданне заставацца ва ўладзе злучылася з цынічнай абыякавасцю да будучыні краіны», — сказаў з трыбуны доктар фізіка-матэматычных навук Андрэй Цатуран.
«Я як чалавек, які некалькі дзясяткаў гадоў пражыў пры савецкім маразме, ведаю, што галоўнае — не губляць сябе, займацца сапраўднай навукай, вырашаць сапраўдныя задачы. Вучыць дзяцей, на колькі б гэты морак ні зацягнуўся», — заклікаў акадэмік Віктар Васільеў, старшыня Маскоўскага матэматычныга таварыства.
25 мая Мінюст Расіі прызнаў «Дынастыю» «замежным агентам». Пасля гэтага заснавальнік «Дынастыі», філантроп Дзмітрый Зімін, заявіў, што закрые фонд. Гэта значыць, без фінансавання застануцца асветніцкія праекты.
У якасці шараговых удзельнікаў на мітынг прайшлі лідары расійскай апазіцыі — Аляксей Навальны і Дзмітрый Гудкоў, адзін з чатырох (з 450) расійскіх дэпутатаў, якія не падтрымалі закон пра далучэнне Крыма.
Больш пра мітынг — у рэпартажы «Новой газеты».
Цяпер чытаюць
Даішнік, якога збіў машынай пенсіянер пад Мінскам, памёр у бальніцы. Яму зладзілі пышнае пахаванне18
Каментары