Асаблівасці кіравання падначаленымі войскамі і сіламі ва ўмовах вядзення «гібрыднай» і «сеткацэнтрычнай» вайны вывучаюць камандзіры і начальнікі Заходняй ваеннай акругі (ЗВА) ў ходзе апэратыўна-мабілізацыйнага збору кіруючага саставу ЗВА, які пачаўся ў сераду ў Санкт-Пецярбургу, паведамляе Міністэрства абароны Расійскай Федэрацыі.
«Упершыню ў апэратыўна-мабілізацыйным зборы кіруючага саставу ЗВА бяруць удзел афіцэры Генеральнага штабу Узброеных сіл Беларусі.
Генералам і афіцэрам Саюзнай дзяржавы трэба абмяняцца досведам, а таксама прыняць удзел у семінарах і круглых сталах», — удакладняе прэс-служба ЗВА.
Камандзіры аб’яднанняў і злучэнняў ЗВА, штабныя афіцэры «праслухаюць курс лекцый па кіраванні войскамі і сіламі ва ўмовах глабальнага інфакамунікацыйнага поля», які будуць чытаць прафесары і выкладчыкі Ваеннай акадэміі Генштабу РФ.
У зборы бяруць удзел больш за 130 генералаў, адміралаў і афіцэраў.
«Сеткацэнтрычная вайна — ваенная дактрына (або канцэпцыя вядзення вайны), ўпершыню ўжытая на практыцы міністэрствам абароны ЗША. Сеткацэнтрычная вайна арыентаваная на павышэнне баявых магчымасцяў войскаў у сучасных войнах і ўзброеных канфліктах за кошт дасягнення інфакамунікацыйнай перавагі, аб’яднання удзельнікаў баявых дзеянняў у адзіную сетку», — гаворыцца ў прэс-рэлізе.
У сваю чаргу гібрыдная вайна, як лічаць у штабе ЗВА, — «ваенная стратэгія, якая аб’ядноўвае звычайную вайну, малую вайну і кібервайну». «Адной з галоўных формаў вядзення гібрыднай вайны з’яўляюцца інфармацыйныя дзеянні, псіхалагічныя акцыі і кібернетычныя атакі, накіраваныя як на структурныя тэхнічныя кампаненты дзяржавы, так і на яго грамадзян. За апошнія гады кампаненты сеткацэнтрычных гібрыдных войн актыўна выкарыстоўваліся процілеглымі бакамі ў ходзе войнаў і канфліктаў у Іраку, Лівіі і Сырыі», — адзначана ў паведамленні.
Цяпер чытаюць
Яны пайшлі ад нас у 2025 годзе. Згадваем беларусаў, якіх мы страцілі3
Каментары