Udzielniki pikietu suprać padvyšeńnia cenaŭ musiać zapłacić milicyi i «chutkaj»

Baranavicki harvykankam dazvoliŭ 16 červienia sacyjał-demakratam pikiet u starym parku, admoviŭšy ŭ pikietach na płoščy Lenina i kala Doma handlu «Viasiołka». Dziesiać udzielnikaŭ pikietu buduć achoŭvać piać milicyjanieraŭ i bryhada chutkaj dapamohi.

Jak raspavioŭ Intex-press arhanizatar pikieta Viačasłaŭ Bołbat, ich meta — vykazvańnie pratestu ŭ suviazi z rezkim panižeńniem uzroŭniu žyćcia žycharoŭ Biełarusi ŭ vyniku devalvacyi biełaruskaha rubla, pavyšeńnia koštaŭ na tavary i pasłuhi.

Zajaŭki na try pikiety byli padadzieny 27 maja siabram Biełaruskaj sacyjał-demakratyčnaj partyi «Hramada» Viačasłavam Bołbatam. 16 červienia płanavałasia pravieści pikiety: z 13:00 pa 14:00 — u starym parku, z 16:00 pa 17:00 — na placoŭcy kala Doma handlu «Viasiołka» (vuł. Savieckaja); z 17.00 da 18.00 — na płoščy Lenina kala fantana. Zajaŭlenaja kolkaść udzielnikaŭ — 10 čałaviek.

U adkazie arhanizataru pikietaŭ za podpisam namieśnika staršyni Baranavickaha harvykankama Dźmitryja Kaściukieviča paviedamlajecca: «Baranavicki haradski vykanaŭčy kamitet vymušany admović Vam u dazvole na praviadzieńnie masavaha mierapryjemstva kala DH „Viasiołka“ i na płoščy Lenina (kala fantana)». Razam z tym Viačasłavu Bołbatu dazvolena z 13:00 da 14:00 pravieści pikiet u starym parku.

Heta tłumačycca tym, što, zhodna z rašeńniem harvykankama № 1497 ad 16.06.2009 sa źmienami ad 5.10.2009 hoda, miescam dla praviadzieńnia masavych mierapryjemstvaŭ u horadzie źjaŭlajecca stary park kultury i adpačynku pa vulicy Kamsamolskaj.

Jak raskazaŭ Viačasłaŭ Bołbat, dazvoleny pikiet mahčymy tolki pry vykanańni umovaŭ rašeńnia harvykankama — prysutnaści na mierapryjemstvie naradu milicyi i bryhady chutkaj dapamohi. Baranavickija sacyjał-demakraty źbirajucca na hetych umovach skarystać šancam danieści svaje pohlady da žycharoŭ horada i rychtujucca da praviadzieńnia dazvolenaha pikieta.

«Ciapier my zajmajemsia zaklučeńniem damovy i apłataj pasłuh miedykaŭ i milicyi», — paviedamiŭ arhanizatar pikieta Viačasłaŭ Bołbat. Pa jaho słovach,

hadzina dziažurstva mašyny chutkaj dapamohi z bryhadaj miedykaŭ abydziecca ŭ 41 tysiaču rubloŭ. Prysutnaść ažno piaci supracoŭnikaŭ milicyi kaštuje 81 tysiaču rubloŭ, bo za znachodžańnie na pikiecie troch aficeraŭ milicyi treba zapłacić pa 17000, a dvuch supracoŭnikaŭ patrulna-pastavoj słužby — pa 15000 rubloŭ u hadzinu».

• 0
• 0
• 0
• 0
• 0
• 0
• 0
• 0