Biełaruskich prapahandystaŭ buduć vučyć baraćbie z fejkami za hrošy ES

Abviestku pra mierapryjemstva ŭ bałharskaj Safii raspaŭsiudziła ahienctva «Minsk-Naviny». «Sajuz bałharskich žurnalistaŭ zaprašaje pradstaŭnikoŭ Biełaruskaha sajuza žurnalistaŭ pryniać udzieł u dyskusii na temu «Štučny intelekt i baraćba z fejkavymi navinami: jakoje rašeńnie budzie najbolš efiektyŭnym?» — havorycca ŭ joj, zaŭvažyŭ BAŽ. 

Chto budzie vučyć baraćbie ź niepraŭdzivymi navinami režymnych prapahandystaŭ?

Jak stała viadoma BAŽ, u mierapryjemstvie ŭdzielničajuć staršynia praŭleńnia Sajuza bałharskich žurnalistaŭ (SBŽ) Śniažana Todarava, siabry SBŽ, pradstaŭniki ahulnajeŭrapiejskaha partała Eualive.net i prajekta EU4Debunk Hieorhi Hocieŭ i Kalina Anhiełava. Miesca ŭ Safii daje SBŽ.

Sajuz bałharskich žurnalistaŭ — adna ź dźviuch žurnalisckich arhanizacyj Bałharyi, jakaja padkreślena praciahvaje supracoŭničać ź biełaruskimi i rasijskimi aficyjnymi miedyja. 

Kiraŭnica SBŽ Śniažana Todarava maje ŭ svajoj krainie reputacyju prychilnicy Rasii. Jana atrymała orden Družby ad Uładzimira Pucina ŭ vieraśni 2025 hoda, časta naviedvaje Rasiju i Biełaruś. Jašče ŭ 2014 hodzie ŭ intervju partału «Stoletije» Todarava zajaviła, što «adradžeńnie fašyzmu i nastup banderaŭcaŭ pužajuć bałhar». Nadalej, hledziačy pa vystupach, jaje pohlady nie źmianialisia.

Razam z tym sajt Sajuza bałharskich žurnalistaŭ dastatkova padrabiazna pisaŭ pra biełaruskija pratesty 2020 hoda, zaraz pieradrukoŭvaje naviny pra Andžeja Pačobuta i pra inšych biełaruskich žurnalistaŭ u źniavoleńni.

Pavialičyć

Pavodle bałharskich rasśledavalnickich resursaŭ, u 2009 hodzie Kamisija archivaŭ raskryła infarmacyju pra suviazi Todaravaj z Šostym upraŭleńniem Słužby dziaržaŭnaj biaśpieki pa baraćbie ź ideałahičnym sabatažam.

Todarava, pavodle źviestak bałharskich ŚMI, dziejničała pad psieŭdanimam «Vijaleta» ŭ savieckaj Bałharyi z 1988 hoda i da źmieny dziaržaŭnaha ładu. Na kaniec 80‑ch Todarava kiravała mižnarodnym adździełam u Sajuzie bałharskich rabočych.

Akramia kiroŭnaj pasady ŭ SBŽ, Śniažana Todarava taksama ŭznačalvaje Kaardynacyjny saviet «Bałharyja — Rasija» pry «Roskanhresie», niedziaržaŭnym rasijskim fondzie, kłasičnaj arhanizacyi «miakkaj siły».

Za čyje hrošy navučańnie ŭ Safii?

Ahulnajeŭrapiejski partał Eualive.net, jaki byŭ stvorany ŭviesnu 2025 hoda ŭ miežach prajekta EU4Debunk, jurydyčna zarehistravany ŭ Brusieli. Im kiruje hramadzianin Bielhii i Bałharyi Hieorhi Hocieŭ, čyja pošta jakraz paznačanaja na sajcie «Minsk-Naviny» dla rehistracyi na antyfejkavuju dyskusiju.

«Misija EUalive.net — pahłybić razumieńnie hramadskaściu taho, što adbyvajecca ŭ ES, u dziaržavach-siabroŭkach i krainach-kandydatach dla šyrokaj hłabalnaj aŭdytoryi. EUalive vybudoŭvaje partniorskija znosiny ŭ śfiery kantentu sa ŚMI, NDA i analityčnymi centrami. My padtrymlivajem mocnuju, adzinuju Jeŭropu, zachoŭvajučy pry hetym krytyčnaje staŭleńnie da instytutaŭ ES. Naša pazicyja adnosna taho, chto źjaŭlajecca ahresaram u vajnie va Ukrainie, całkam zrazumiełaja», — zajaŭlaje Eualive.net.

A prajekt AI4Debunk, u miežach jakoha dziejničaje Eualive.net i pravodzicca kanfierencyja ŭ Safii, «abjadnoŭvaje miždyscyplinarny kansorcyum, jaki achoplivaje šyrokaje koła dyscyplin — ad sacyjołahaŭ i śpiecyjalistaŭ u halinie ŚMI da raspracoŭnikaŭ prahramnaha zabieśpiačeńnia i ekśpiertaŭ pa štučnym intelekcie i mašynnym navučańni, — z metaj usiebakovaha vyvučeńnia ŭsiaho śpiektra pracesaŭ dezinfarmacyi».

Uznačalvaje kansorcyum AI4Debunk u jakaści kaardynatara Łatvijski ŭniviersitet u Ryzie.

Na sajcie AI4Debunk paznačana, što jaho dziejnaść finansujecca Jeŭrasajuzam, «adnak vyjaŭlenyja tut pohlady i mierkavańni naležać vyklučna aŭtaru (aŭtaram) i nie abaviazkova adlustroŭvajuć pohlady Jeŭrapiejskaha sajuza ci Jeŭrapiejskaj kamisii, ni Jeŭrapiejski sajuz, ni Jeŭrapiejskaja kamisija nie niasuć za ich adkaznaści».

Pavodle źviestak BAŽ, za kratami ŭ Biełarusi ciapier znachodziacca 28 pradstaŭnikoŭ i pradstaŭnic miedyja.

• 0
• 3
• 2
• 9
• 0
• 0
• 6
• 0