U Biełarusi płanujuć istotna źmienšyć sumu padarunkaŭ, jakaja nie abkładajecca padatkami

Zakonaprajekt ab uniasieńni źmienaŭ u Padatkovy kodeks praduhledžvaje amal dvuchrazovaje źmianšeńnie sumy padarunkaŭ, za jakuju nie treba płacić padatki.

Što źmienicca?

Ciapier padarunki na sumu da 11 516 rubloŭ (kala 3800 dalaraŭ pavodle ciapierašniaha kursu) na hod padatkam nie abkładajucca.

Pavodle zakonaprajekta, hetuju sumu chočuć źmienšyć da 6000 rubloŭ (kala $2000).

Suma, jakaja pieravyšaje vyznačanyja limity, abkładajecca padachodnym padatkam u pamiery 13%.

Farmalna, kali na viasielle, jubilej ci prosta tak siabry za hod (padarunki ad blizkich svajakoŭ u hetuju sumu nie ŭličvajucca) padaryli vam 10 tysiač rubloŭ, to ciapier płacić ź ich ničoha nie treba, a kali źmieny prymuć, to daviadziecca płacić padatak z 4000 rubloŭ.

Na praktycy heta, kaniešnie, naŭrad ci tak pracuje, bo adsačyć padoranuju sumu amal niemahčyma, pakolki zvyčajna ŭsie dorać najaŭnyja.

Ludzi redka dekłarujuć hrošy, jakija im padaryli.

«Chiba tolki ŭ vypadkach, kali čałavieku treba niejak adbialić svaje dachody, zapłaciŭšy adnosna nievialiki padatak z sumy, jakaja pieravyšaje limit», — tłumačyć były padatkavik.

Čamu ŭvodziać takija źmieny?

Na jaho dumku, dziaržava choča istotna źmienšyć hetuju ličbu ŭ miežach ahulnaj baraćby ź cieniavymi dachodami i zarpłatami ŭ kanviertach. Što ŭ pryncypie źjaŭlajecca ahulnasuśvietnaj praktykaj.

«Vyhladaje, što heta robicca dziela taho, kab ludziam stała składaniej apraŭdvacca pierad padatkovaj, kali pry praviercy vyśvietlicca, što ich vydatki pieravyšajuć dachody», — tłumačyć surazmoŭca.

Taksama važna razumieć, što razam sa źmianšeńniem sumy, jakaja nie abkładajecca padatkam, kali razmova idzie pra padarunki, u padatkovaj źnizicca płanka, paśla jakoj možna pačynać cikavicca čałaviekam, čyje vydatki pieravyšajuć aficyjnyja zarobki.

Naprykład, čałaviek nabyŭ sabie nieruchomaść abo aŭtamabil, jakija naŭrad ci moža sabie dazvolić praź nizki zarobak.

Pavialičyć

I choć padarunki ad svajakoŭ nie majuć limitaŭ, śpisać usio na ich niemahčyma, bo kali sumy vialikija, to padatkovaja ŭžo zacikavicca svajakami — adkul u ich takija hrošy. U dadatak, blizkija svajaki jość nie va ŭsich, dy i ich kolkaść, u adroźnieńnie ad siabroŭ, usio adno abmiežavanaja.

«Tamu pradumanyja ludzi mahli rabić tak, što nibyta ennuju sumu hrošaj im daryli svajaki, a jašče, naprykład, pa 9—10 tysiač rubloŭ štohod atrymlivali padarunkami ad siabroŭ», — dzielicca były padatkavik.

Ciapier ža, kali suma padarunkaŭ, jakaja nie abkładajecca padatkam, budzie źmienšanaja praktyčna ŭdvaja, rabić padobnyja machinacyi stanie bolš składana.

• 0
• 0
• 0
• 0
• 0
• 0
• 3
• 0