Na miažy nul mašyn, a vyjechać možna tolki praz tydzień. Što adbyvajecca z vyjezdam z Łatvii ŭ Biełaruś
Užo tydzień na vyjeździe z Łatvii ŭ Biełaruś dziejničaje płatnaja elektronnaja čarha. Padarožniki skardziacca, što ciapier vyjechać z Łatvii ŭ hety bok vielmi składana. Razabralisia, što tam adbyvajecca.
Što źmianiłasia?
Pačynajučy z 15 kastryčnika 2025 hoda, kab vyjechać z Łatvii ŭ Biełaruś i Rasiju, treba zahadzia zarehistravacca ŭ elektronnaj čarzie. Zbor składaje — 9,3 jeŭra.
Łatvijski ŭrad tłumačyć novaŭviadzieńnie žadańniem uparadkavać ruch na miažy i skaracić čerhi.
U vyniku fizičnyja čerhi, jakija na łatvijskim kirunku i biez hetaha byli redkaściu, źnikli naohuł.
Pa stanie na viečar 21 kastryčnika, bližejšaja svabodnaja data na vyjezd z Łatvii ŭ Biełaruś praz adziny dziejny punkt propusku «Paternijeki» (ź biełaruskaha boku «Hryharoŭščyna») — 29 kastryčnika, a 23‑j hadzinie.
Dla tych, chto nie hatovy da pierasiačeńnia miažy ŭ načnyja hadziny, situacyja vyhladaje jašče horšaj. Bližejšaje akienca z prajezdam u dzionny čas jość tolki na 3 listapada.
Adnosna svabodna vybirać čas vyjezdu z Łatvii možna pačynajučy z 6 listapada.
Ci možna prajechać raniej, kali na miažy pusta?
Pa padlikach ludziej, jakija časta pierasiakali hetuju miažu, paśla źjaŭleńnia elektronnaj čarhi prapusknaja zdolnaść źniziłasia amal u dva razy.
«Praz hety pierachod amal zaŭsiody prachodziła 80‑100 mašyn u sutki, i ni čarhi pierad łatvijskim šłahbaumam, ni asablivaj taŭchaniny na samoj miažy na vyjezd z Łatvii nie było. Zaraz kolkaść rehistracyjnych słotaŭ na sutki — 55. Tak što było pusta, a ciapier, viadoma ž, stanie jašče bolš pusta!» — piša adzin z karystalnikaŭ admysłovaha čata ŭ telehramie.
Pry hetym, pavodle infarmacyi na sajcie biełaruskaha Pamiežnaha kamiteta, prapusknaja zdolnaść punkta «Hryharoŭščyna» składaje 300 lehkavych aŭto ŭ sutki ŭ adnym kirunku.
Situacyju, jakaja skłałasia, niekatoryja padarožniki ŭ čatach nazyvajuć faktyčnym zakryćciom miažy Łatvijaj. Inšyja pahadžajucca, što novaŭviadzieńni z elektronnaj čarhoj zroblenyja dla taho, kab nichto nie jeździŭ.
Inšych varyjantaŭ, jak zahadzia zapisacca ŭ elektronnaj čarzie za 9,3 jeŭra i pryjechać u abaznačany čas na miažu, niama.
«Telefanavaŭ ciapier im, pytaŭsia: što kali niama volnaha času na kankretnuju datu, ci možna pryjechać na miažu i dačakacca volnaha akna? Adkazali: vas nie zapuściać, a ŭjezd dazvolać na padstavie svabodnaj daty i času na sajcie», — dzielicca dośviedam udzielnik pryhraničnaha čata.
Šmat abmierkavańniaŭ hetaj temie pryśviečana ŭ fejsbuku.
Niekatoryja ludzi, jakija dniami prajazdžali praź miažu, raspaviadajuć, što pryjazdžali za 1,5‑2 hadziny da naznačanaha času i ich zapuskali raniej, bo mašyn na miažy nie było.
«Tydzień tamu kupiła elektronnuju čarhu. Siońnia, 17 kastryčnika, u mianie byŭ čas 11:00. Padjechała da šłahbauma ŭ 9:40. I pakolki nie było mašyn na miažy, mianie prapuścili ŭ hety čas. Usio vielmi chutka. Na biełaruskim baku taksama nie zatrymali. Usio ŭ zvyčajnym režymie», — padzialiłasia padarožnica.
Ale naŭmysna pryjazdžać za niekalki hadzin da zabraniravanaha času nie varta, bo nie ŭsie pahraničniki hatovyja prapuścić mašynu raniej, navat z ulikam pustoj hranicy.
«Zarehistravalisia na 20:10 (pieršy volny čas jaki byŭ), a prybyli na miažu a 14:30 (prypłyli na paromie sa Šviecyi ranicaj i adrazu nakiravalisia na miažu). Nakiravalisia adrazu da pasta, kab daviedacca što dy jak. Miaža była pustaja, nivodnaj mašyny. Pamiežniki skazali: čakajcie i sprabujcie a 18‑j viečara, a pakul čakajcie na parkoŭcy sprava ad pasta. A 18‑j padjechali znoŭ, pamiežniki źmianilisia i skazali čakajcie sms. U vyniku sms pryjšło za 20 chvilin, to bok a 19:50», — padzialiłasia infarmacyjaj padarožnica, jaka jechała 15 kastryčnika.
Ciapier čytajuć
Ciahnik Pinsk—Minsk spyniŭsia pad Dziaržynskam biez aciapleńnia. Paśla prybyćcia ŭ stalicu pasažyraŭ razabrali ludzi z sacsietak i raźvieźli pa chatach1515
Kamientary