Kaho pryznali najlepšymi mastakami Biełarusi 2025 hoda? Voś jak vyhladajuć ich tvory
Mikita Monič padrychtavaŭ ahlad prac, jakija pieramahli na vystavie «Art-Minsk-2025».
Vystava sučasnaha mastactva «Art-Minsk» prachodzić štohod viasnoj. U im udzielničajuć sotni tvorcaŭ. Kožny z adabranych vystaŭlaje 2-3 tvory. Naviedvalniki hałasujuć. I tak adbirajucca pieramožcy.
U novym videa na svaim jutub-kanale Mikita Monič raskazaŭ pra pieramožcaŭ u katehoryi «Žyvapis» i ich tvory.
Pieršaje miesca hledačy addali Alesi Skarabahataj. I heta, pa słovach Moniča, nie dziŭna.
«Biełaruskaja publika — heta jak San-Maryna. Alesia Michajłaŭna — naša Italija. Akramia svajoj zvyšrealistyčnaj techniki, spadarynia Skarabahataja biespamyłkova sfarmulavała recept tvora mastactva, što padabajecca biełaruskamu hledaču. Heta pavinien być kruhły farmat pałatna. Tam pavinna štości smačnaje, pradmiet posudu i jaki-niebudź miły źviarok. Tvor maje być padobnym i na niderłandski naciurmort 17 stahodździa i na sučasnuju fud-fatahrafiju».
Pa słovach Moniča, hety śpis jon sfarmulavaŭ jašče da taho, jak staŭ šukać tvory-pieramožcy hetaha hoda, bo daŭno znajomy z tvorčaściu Skarabahataj. Ale, jak jon iranizuje, tvor-pieramožca — karcina «Apošni inhredyjent» nie całkam adpaviadaje «receptu».
«Viadoma, jość tyja, chto ličyć, što muchamory — hryby jadomyja. Ale lepiej nie treba», — davodzić mastactvaznaŭca.
Druhoje miesca ŭ hety hodzie hledačy prysudzili tvoram Alesia Bahdanava. Monič źviartaje ŭvahu na karcinu mastaka «Pieršaje spatkańnie»:
«Mnie padałosia, što heta historyja pra ich kachańnie z Alesiaj Skarabahataj. Tak! Siarod pieramožcaŭ u katehoryi «Žyvapis» 40% z adnoj siamji». Pa jaho słovach, muža i žonku jadnaje luboŭ da realizmu ŭ žyvapisie, kulinarny dy kruhły farmaty.
Siarod pieramožcaŭ taksama piejzažy Hanny Sadoŭskaj «Chałodny bierah» i «Zimovaja kazka».
Jak ličyć Monič, hetyja tvory nie vyznačajucca svajoj aryhinalnaściu. Heta «dychtoŭnyja, dobra zroblenyja piejzažy rodnaj staronki. Jany byccam školnyja sačynieńni-vydatniki. Usio pa temie, łahična, pravilna. Nul pamyłak, nul pamarak. Tolki ja nie razumieju, navošta na ich hladzieć bolš za adzin raz».
U styli prostaha i jakasnaha adlustravańnia pryrody pracuje i nastupnaja pieramožca konkursu — Taćciana Čarnych (Archipava).
«Jana maluje kvietki. Vialiki bukiet u hlinianym zbanie ci kvitniejučyja kusty na fonie amal što žukoŭskaha lesu», — adzinaje, što zmoh skazać Monič pra tvory mastački.
Apošniaj pieramožcaj u katehoryi «Žyvapis» stała Elmira Muchtarava.
Pa słovach Moniča, u jaje tvorach «idealnaje adlustravańnie instahram-estetyki plus vajbu cytataŭ z pacanskich pablikaŭ Ukantakcie».
Mastactvaznaŭca źviartaje ŭvahu na adno z pałotnaŭ mastački — «Ujaŭnaja rečaisnaść»:
«Tam kity laciać siarod lesu. Mnie adrazu zhadaŭsia łatvijski multfilm Flow, ale bolš jarka zhadvajecca frahmient z kinastužki «Aŭtaspynam pa Hałaktycy».
Druhi tvor, jaki mastačka prezientavała na «Art-Minsku», jana nazvała «Na ziamli jak na niabiosach».
«Ja lublu pafas, ščyra. Ale ž nie taki. Znoŭku zhadvajecca frahmient pra kita. Prykładna ŭ takija hory jon i ŭpaŭ», — sarkastyčna zaŭvažaje Monič.
Mastactvaznaŭca tłumačyć, što zvyčajna farmuloŭka pra padabienstva ziamli i niabiosaŭ adlustroŭvajecca ŭ žyvapisie tym, što architekturnaja azdableńnie raju supadaje ci prosta padobnaje na tyja formy, što adlustroŭvajuć ideju carkvy na ziamli.
«To-bok carkva — madel hrada niabiesnaha»
I ŭ jakaści prykładu jon pryvodzić tvor «Krynica lubaty» (1430-1450 hh.) nieviadomaha mastaka z majsterni Jana van Ejka.
Monič źviartaje ŭvahu, što pieramožcami hetaha hoda stali čatyry žančyny i adzin mužčyna, jakija adnačasova i muž adnoj ź ich:
«Ja zaŭsiody kazaŭ, što ŭ sučasnym vyjaŭlenčym mastactvie Biełarusi daminujuć žančyny».
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary