Pucin učora pavinšavaŭ rasijan z vyzvaleńniem Kurskaj vobłaści. Z-błohiery jaho abvierhli

Rasijskija pravajennyja kanały paviedamili ab praciahu bajoŭ u Kurskaj vobłaści paśla taho, jak Uładzimir Pucin pavinšavaŭ načalnika Hienštaba Valeryja Hierasimava z «poŭnym razhromam praciŭnika ŭ kurskim pamiežžy». Pavodle paviedamleńniaŭ z-błohaŭ, ukrainskija vajskoŭcy zachavali pazicyi ŭ rajonie jak minimum troch nasielenych punktaŭ — Atruba Hłuškaŭskaha rajona, Harnal i Alešnia Sudžanskaha, piša «Ahientstvo».

Padčas dakładu Pucinu Hierasimaŭ zajaviŭ, što «vyzvaleny ad ukrainskich padraździaleńniaŭ apošni nasieleny punkt na terytoryi Kurskaj vobłaści — siało Harnal». «Takim čynam, zavieršany razhrom uzbrojenych farmiravańniaŭ Uzbrojenych Sił Ukrainy, jakija ŭvarvalisia ŭ Kurskuju vobłaść», — zajaviŭ kiraŭnik Hienštaba RF. Jon dadaŭ, što «ciapier u vyzvalenych rajonach Kurskaj vobłaści pravodziacca mierapryjemstvy dla vyjaŭleńnia adzinočnych vajskoŭcaŭ USU, jakija sprabujuć schavacca na rasijskaj terytoryi».

Pucin u adkaz pavinšavaŭ «uvieś asabovy skład, usich bajcoŭ i kamandziraŭ z hetym pośpiecham, ź pieramohaj» i «razhromam nieanacysckich farmavańniaŭ, jakija ŭvarvalisia na rasijskuju terytoryju ŭ Kurskaj vobłaści».

Adnak z-kanały paśla hetaha paviedamili, što častka terytoryj rehijonu zastajucca ŭ šeraj zonie, a častku praciahvajuć kantralavać USU.

«Praciŭnik prysutničaje ŭ chutary Atruba Hłuškaŭskaha rajona, i prylehłyja da jaho terytoryi znachodziacca pad kantrolem praciŭnika», — napisaŭ błohier Juryj Kacionak. Pavodle jaho słoŭ, taksama «zastajucca nievialikija ačahi supracivu USU ŭ rajonie Alešni». Ab bajach pobač z Alešniaj paviedamiŭ i kanał «Archanhieł śpiecnaza».

Krytyčna dakład Hierasimava acaniŭ i Kurski z-błohier Raman Alochin. «Adśviatkujem poŭnaje vyzvaleńnie Kurskaj vobłaści my dakładna nie siońnia. Tamu što pieramoha dla žycharoŭ Kurskaj vobłaści — heta nie pieratvareńnie častki nasielenych punktaŭ u šeruju zonu, kudy niebiaśpiečna jeździć, dy i naohuł nie puskajuć navat, i kudy čas ad času praryvajecca vorah», — napisaŭ Alochin.

Vioska Harnal, ab vyzvaleńni jakoj paviedamlaŭ Hierasimaŭ Pucinu, «vyzvalena nie całkam», napisaŭ Juryj Padalaka. «Jašče tam jość ačahi supraciŭleńnia praciŭnika. I heta moža praciahvacca tut jašče niekatory čas», — napisaŭ Padalaka.

Jon dadaŭ, što «jašče niachutka žychary pamiežnaj Kurščyny (uklučajučy Sudžu) viernucca ŭ svaje damy, bo da linii frontu adtul niedaloka». «A bai, jakija praciahvajucca na miažy i krychu na terytoryi Sumščyny, iduć vielmi žorstkija», — dadaŭ Padalaka.

Blizki da Minabarony Ukrainy OSINT-prajekt DeepState nazvaŭ infarmacyju ab zaviaršeńni Kurskaj apieracyi rasijskim vojskam «fejkam». Pavodle źviestak prajekta, ukrainskija vajskoŭcy zachoŭvajuć kantrol nad pazicyjami vakoł viosak Harnal i Alešnia. Pavodle źviestak prajekta, pad kantrolem ukrainskich vajskoŭcaŭ zastajecca 28 kv. km Kurskaj vobłaści.

Vyciaśnieńnie USU z Kurskaj vobłaści — abaviazkovaja ŭmova dla Uładzimira Pucina, paśla jakoj jon budzie hatovy da vychadu z vajny, pisaŭ raniej hałoŭred «Niezaležnaj haziety» Kanstancin Riemčukov.

Zajavu ab «razhromie» USU pad Kurskam Kreml zrabiŭ na fonie sustrečy prezidentaŭ ZŠA i Ukrainy Donalda Trampa i Uładzimira Zialenskaha ŭ Vatykanie, paśla jakoj Tramp napisaŭ druhi za dva dni krytyčny kamientar na adras Uładzimira Pucina, asudziŭšy jaho za ŭdary pa Ukrainie.

• 0
• 0
• 7
• 1
• 0
• 0
• 0
• 0