Japoncu, jaki pałovu stahodździa čakaŭ śmiarotnaha prysudu i byŭ apraŭdany, pryznačyli $1,5 miljona kampiensacyi
Akruhovy sud prefiektury Sidzuoka pastanaviŭ, što centralny ŭrad Japonii pavinien vypłacić 89-hadovamu Ivaa Chakamada kampiensacyju ŭ pamiery amal 1,5 miljona dalaraŭ ZŠA. Mužčyna pravioŭ u źniavoleńni 47 hadoŭ i 7 miesiacaŭ, čakajučy vykanańnia śmiarotnaha prysudu, ale ŭ vyniku byŭ apraŭdany, piša Kyodo.
Chakamada pracavaŭ na zavodzie pa vytvorčaści pasty miso. U 1966 hodzie jaho aryštavali pa abvinavačańni ŭ rabavańni i zabojstvie svajho načalnika, jahonaj žonki i dvuch dziaciej. Na dopycie mužčyna pryznaŭsia ŭ zabojstvie, ale padčas suda zajaviŭ, što pryznańnie było vybita pad katavańniami.
U 1968 hodzie akruhovy sud Sidzuoki prysudziŭ Chakamadu da śmiarotnaha pakarańnia, a ŭ 1980-m heta rašeńnie paćvierdziŭ Viarchoŭny sud Japonii. Uvieś hety čas Chakamada ŭtrymlivaŭsia ŭ kamiery śmiarotnikaŭ. U 2011 hodzie jaho ŭnieśli ŭ Knihu rekordaŭ Hinesa jak čałavieka, jaki najbolš praciahły čas prabyŭ u čakańni śmiarotnaha prysudu.
U 2014 hodzie sprava była nakiravana na pierahlad. U sudzie Sidzuoki ŭstanavili, što DNK Chakamady nie supadaje z hienietyčnym materyjałam, znojdzienym na miescy złačynstva. Paśla hetaha mužčynu vyzvalili, ale Vyšejšy sud Tokia ŭ 2023 hodzie pakinuŭ u sile rašeńni ab paŭtornym razhladzie spravy.
U vieraśni 2024 hoda sud Sidzuoki apraŭdaŭ Chakamadu, pryznaŭšy try vypadki falsifikacyi dokazaŭ. Ekśpiertyzy, zhodna ź jakimi kroŭ na adzieńni z kantejniera ź miso naležyć achviaram i nibyta samomu Chakamadu, byli pryznany niesapraŭdnymi. Sud ukazaŭ, što pryznańnie, zroblenaje na dopycie, było «faktyčna sfabrykavanaje» i atrymana «praź fizičny i psichałahičny hvałt».
Kamientary
Nie jasna, čamu hienietyčnuju ekśpiertyzu nie zrabili hadoŭ 10-20 nazad. Napeŭna, ŭ Japonii taksama bluduć "čeść mundzira". Dziakuj Bohu, nie tak uparta, jak u nas.
Pakarańnie nievinavataha zaŭsiody horš za toje, kab adpuścić vinavataha. U abodvuch vypadkach vinavaty na svabodzie. Ale ŭ pieršym jašče i nievinavaty cierpić. Adsiul biarecca prezumpcyja nievinavataści.