Stali viadomyja techničnyja charaktarystyki zvyšsakretnych dronaŭ, jakija ZŠA pastaŭlajuć Ukrainie
Pra pastaŭki dronaŭ Ukrainie ZŠA paviedamili jašče ŭ krasaviku 2022 hoda. Adnak na praciahu dvuch hadoŭ nie źjaviłasia nivodnaj dakładnaj fatahrafii ci videa hetych bieśpiłotnikaŭ z paloŭ bitvaŭ. Ź ich kampanientaŭ pierad adpraŭkaj vydalajucca ŭsie identyfikacyjnyja mietki, a pavierchnia pracirajecca, kab prybrać adbitki palcaŭ.
Jak piša Forbes, ab isnavańni prajekta Phoenix Ghost jak častki vajennaj dapamohi Ukrainie Ministerstva abarony ZŠA ŭpieršyniu zhadała ŭ krasaviku 2022 hoda.
Z toj pary kampanija Aevex Aerospace ŭ ramkach prajekta pastaviła Ukrainie bolš za 5000 dronaŭ — bolš, čym luby inšy vytvorca ŭ ZŠA, — na sumu $582 miljona. Ale da niadaŭniaha času sakretnaść, praduhledžanaja kantraktami Pientahona, vymušała Aevex i ŭkrainskuju armiju zachoŭvać maŭčańnie, što paradžała roznyja čutki i zdahadki.
Samo miesca vyrabu dronaŭ zachoŭvałasia ŭ tajamnicy. Kampanija była papiaredžana, što Rasija sprabuje vyličyć pastaŭščykoŭ zbroi dla Ukrainy, u tym liku supracoŭnikaŭ kampanii. Kab abaranić ich, z kampanientaŭ aparataŭ vydalajucca ŭsie identyfikacyjnyja mietki, a sami drony pierad adpraŭkaj staranna pracirajucca, kab nie pakinuć śladoŭ adbitkaŭ palcaŭ ci DNK.
Na praciahu dvuch hadoŭ nie źjaŭlałasia nivodnaj dakładnaj fatahrafii ci videa hetych bieśpiłotnikaŭ z paloŭ bitvaŭ. Adnak uvosień hetyja abmiežavańni sasłabli, i žurnalisty Forbes zmahli naviedać zavod Aevex u horadzie Tampa ŭ Fłarydzie.
Jak vyśvietliłasia, u ramkach prajekta Phoenix Ghost byli raspracavany niekalki madelaŭ bieśpiłotnikaŭ. Žurnalistam pakazali tolki niekalki ź ich. Inšyja pakul zastajucca zasakrečanymi.
Dla vytvorčaści bieśpiłotnikaŭ pa zamovie Pientahona kampanija Aevex abjadnałasia z kampanijaj Tribe Aerospace, jakaja ŭžo mieła nievialikuju vytvorčaść u Tampie. Pierad vytvorcami była pastaŭlena zadača stvareńnia maksimalna tannaha ŭdarnaha drona.
Inžyniery Tribe Aerospace madyfikavali madel bieśpiłotnika Dagger, jaki jany vyrablali ŭ nievialikaj kolkaści. Da jaho dadałasia bojehałoŭka i sistema ŭzbrajeńnia, jakaja praduchilaje zaŭčasnyja vybuchi. Dla korpusa vykarystali kardonny paštovy tubus, abhornuty vuhlavałaknom.
Jak piša internet-vydańnie Militarnyi, daŭžynia Dagger składaje 1,8 mietra, a razmach kryłaŭ — 2,6 m. Maksimalnaja ŭźlotnaja masa dasiahaje 16 kiłahram, ź jakich 3,6 kiłahram prypadaje na bajavuju častku. Dalnaść palotu — 190 kiłamietraŭ, a praciahłaść — da 80 chvilin.
Pa słovach vytvorcaŭ, efiekt ad vykarystańnia Dagger u bajavych umovach chutka prajaviŭsia. Navat kali dron źbivali, jaho košt pamieram $49 tysiač apraŭdvaŭ siabie, adciahvajučy darahija rasijskija rakiety SPA. «My žartavali: kardonnaja truba kaštuje vorahu $500 tysiač», — cytuje vydańnie kiraŭnika padraździaleńnia dronaŭ kampanii Aevex Lindsi Džonsa.
Pa miery taho jak kanflikt pierajšoŭ u pazicyjnuju stadyju, a Ukraina naładziła vytvorčaść mnostva nievialikich udarnych dronaŭ, patrebnaść u Dagger źniziłasia. Aevex pieraklučyłasia na vypusk bolš bujnych i dalnabojnych madelaŭ Disruptor (koštam $69 tysiač) i Dominator.
Jak paviedamlaje internet-vydańnie Militarnyi, dron Disruptor maje trubčaty vuhlapłastykavy fiuzielaž z dvuma pramymi kryłami i V-padobnym apiareńniem. Jaho daŭžynia — 3 mietry, razmach kryłaŭ — 4,8 mietra.
Hety dron maje maksimalnuju ŭźlotnuju masu 84 kiłahramy pry zapusku ź pnieŭmatyčnaj katapulty. Masa moža być pavialičana da 93 kiłahram pry vykarystańni rakietnaha paskaralnika. U Aevex taksama zajaŭlajuć, što Disruptor možna zapuskać z aŭtamabila, ale nie paviedamlajuć nijakich dadatkovych padrabiaznaściaŭ.
Choć Disruptor i Dominator sastupajuć pa mahčymaściach daražejšym sistemam, jany mohuć brać na bort šmat vybuchoŭki i efiektyŭna paražać važnyja nieruchomyja celi, naprykład, składy z palivam ci bojeprypasami.
Abstalavany nievialikim ruchavikom unutranaha zharańnia Disruptor moža znachodzicca ŭ pavietry 4,5 hadziny i pralatać dystancyju kala 600 kiłamietraŭ z bajavoj častkaj masaj 22,5 kiłahrama.
Pradstaŭniki Aevex paviedamili žurnalistam, što Dominator identyčny Disruptor pa ahulnaj daŭžyni i razmachu kryłaŭ, ale maje zusim inšuju aeradynamičnuju kanstrukcyju ź pieraviernutym V-padobnym chvastom.
Maksimalnaja ŭźlotnaja masa Dominator składaje 93-100 kiłahramaŭ pry zapusku z katapulty ci z rakietnym paskaralnikam. Jak i papiaredniaja raspracoŭka, jon zdolny znachodzicca ŭ pavietry 4,6 hadziny ci 11,7 hadziny z alternatyŭnym ruchavikom (što za ruchavik, nie paviedamlajecca). Dalnaść palotu dasiahaje 500 kiłamietraŭ (1200 kiłamietraŭ z alternatyŭnym ruchavikom).
Kanstrukcyja bieśpiłotnikaŭ i pnieŭmatyčnaj puskavoj ustanoŭki dazvalajuć ich pakavać u razabranym vyhladzie ŭ dosyć małyja pa pamierach skryni, jakija mohuć źmiaścicca ŭ furhony, što ŭkraincy zvyčajna vykarystoŭvajuć dla pieravozki ryštunku pa poli boju.
Inžyniery Aevex adznačajuć, što ŭvieś čas madyfikujuć svaje sistemy, kab reahavać na rasijskija kontrmiery. Jany taksama prystasavali aparaty dla zborki ŭ składanych umovach, naprykład, u maroz bieź źniaćcia palčatak.
Kab sabrać Disruptor, treba ŭsiaho piać chvilin. Heta dapamahaje chutka padnimać bieśpiłotniki ŭ pavietra, što minimizuje ryzyku vyjaŭleńnia apierataraŭ rasijskimi vojskami.
Ale drony kampanii Aevex aryjentavanyja nie tolki na vykarystańnie va Ukrainie. Jak pišuć žurnalisty, bieśpiłotniki Disruptor i Dominator adpaviadajuć standartam Pientahona i padychodziać dla płanaŭ ZŠA pa masavaj zakupcy adnarazovych dronaŭ u vypadku vajny z Kitajem.
U kastryčniku Aevex nabyła kampaniju Veth Research Associates, kab palepšyć navihacyju i aŭtanomnaść svaich aparataŭ, zrabiŭšy ich efiektyŭnymi va ŭmovach padaŭleńnia suviazi i na abšarach akijanaŭ.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ8
Kamientary