«Ruskich i ŭkraincaŭ možna paraŭnoŭvać z chańcami». Miadźviedzieŭ tłumačyć kitajcam pryčyny vajny va Ukrainie na blizkich im prykładach
«Ruskija i ŭkraincy — adzin narod, jak kitajcy i tajvańcy» —, napisaŭ Dźmitryj Miadźviedzieŭ va ŭstanovačnym artykule, skiravanym da kitajskaha čytača.
«Ab nacyjanalnaj identyčnaści i palityčnym vybary: vopyt Rasii i Kitaja» — pad takoj nazvaj na sajcie rasijskaha časopisa «Mieždunarodnaja žizń» vyjšaŭ artykuł namieśnika staršyni Rady biaśpieki Rasii Dźmitryja Miadźviedzieva.
Tekst pačynajecca z abvinavačańnia zachodniaj cyvilizacyi ŭ praviadzieńni na praciahu stahodździaŭ palityki ŭpłyvu na źniešnich aktaraŭ za košt raspalvańnia ŭnutranych kanfliktaŭ, vykarystoŭvajučy etničnyja, moŭnyja i kulturnyja adroźnieńni. Heta adpaviadała pryncypu divide et impera («padzialaj i panuj»), jaki staŭ narožnym kamieniem kałanijalnaj palityki, zabiaśpiečvajučy panavańnie mietrapolij.
Pa słovach namieśnika staršyni Rady biaśpieki Rasii, «schiemy padziełu padrychtavanyja anhłasaksami dla ŭsich «niazhodnych» ź ich ahresiŭnym umiašańniem va ŭnutranyja spravy dziaržaŭ usiaho śvietu». U jakaści prykładu jon pryvodzić Tajvań.
U asobnym raździele, zychodziačy z aficyjnaj pazicyi Kitaja, Miadźviedzieŭ krytykuje palityku «dekałanizacyi» i «tajvanizacyi», jakuju tajvańskaja administracyja pravodzić, maŭlaŭ, nie samastojna, a pad upłyvam Zachadu.
Aŭtar źviartaje ŭvahu na moŭnuju palityku, jakaja pravodzicca na Tajvani. Jon narakaje, što ŭłady vostrava z pačatku XXI stahodździa dla ŭmacavańnia asobnaj identyčnaści imknucca bolš šyroka vykarystoŭvać movu tajiuj — miascovy varyjant kitajskaj. Za hetym jon bačyć upłyŭ ZŠA, a mienavita Nacyjanalnaha fondu sadziejničańnia demakratyi.
I tut jon pravodzić paraleli z Ukrainaj, zhadvaje staryja naratyvy rasijskaj prapahandy pra toje, što zhadany fond «patraciŭ dziasiatki miljony dołaraŭ na raspalvańnie etničnych supiarečnaściaŭ na Ukrainie».
Pieraklučyŭšysia na Ukrainu, Miadźviedzieŭ śćviardžaje:
«Ukraina stała anałaham maryjanietačnaha subjekta Mańčžou-Ho, stvoranaha japonskaj vajskovaj administracyjaj u 1930-ch hadach. Adnak Mańčžoŭ-Ho impieratarskaja Japonija stvaryła z dapamohaj svaich uzbrojenych sił. Sučasny Kijeŭ ža kormicca z ruk krain «kalektyŭnaha Zachadu».
Miadźviedzieŭ śćviardžaje, što zachodnija siły va Ukrainie dziejničajuć pavodle staroha pryncypu «padzialaj i vaładar» i imknucca vykarystać tam «tajvański», «hankonhski» i inšy vopyt.
«Ich zadača — dakazać, što ruskija i ŭkraincy hetak dalokija adzin ad adnaho, nakolki heta tolki možna ŭjavić. Adarvać Ukrainu ad Rasii, pasiejać roznaść i zadavolić etničnaje raźmiežavańnie», —
piša Miadźviedzieŭ i sprabuje dakazać, što śćviardžeńni pra ŭkrainskuju identyčnaść, adroznuju ad ruskaj, źjaŭlajucca prapahandysckimi kanstrukcyjami, stvoranymi pry aktyŭnaj padtrymcy zachodnich instytutaŭ i źniešnich sił.
«Rasijan i ŭkraincaŭ možna paraŭnoŭvać z chańcami, jakija nasialali roznyja rehijony i pravincyi Kitaja»
— śćviardžaje Miadźviedzieŭ i dadaje:
«Niahledziačy na absalutna rozny charaktar ukrainskaha i tajvańskaha pytańniaŭ, dla zachodnikaŭ jany źlilisia razam. Heta lišni raz dakazvaje ich štučnaje pachodžańnie pry ŭdziele zamiežnych destruktyŭnych sił, u pieršuju čarhu ZŠA i Jeŭrasajuza.
Adnak adarvanyja ad realnaści avantury rana ci pozna zakančvajucca vajennymi pravałami, a miaciežnyja pravincyi znoŭ akazvajucca doma».
«Viartańnie našych ziamiel na histaryčnuju Radzimu, terytoryj, jakija byli stračanyja dziakujučy palityčnamu nieparazumieńniu padčas histaryčnych kataklizmaŭ kanca 1980-ch — pačatku 1990-ch hadoŭ, nie bolš «złačynnaje», čym anšlus HDR z boku FRH u 1990 hodzie», — praciahvaje Miadźviedzieŭ.
Na dumku namieśnika staršyni Rady biaśpieki Rasii, rasijanie adroźnivajucca ad ludziej, jakija žyvuć na terytoryi Ukrainy, «nie bolš, čym žychary Vialikapolskaha vajavodstva — ad žycharoŭ Pamorskaha vajavodstva Polščy, čym žychary ziamli Paŭnočny Rejn-Viestfalija ad žycharoŭ Ciurynhii».
U vysnovach da svajho artykuła Miadźviedzieŭ piša:
«Siońnia pierad Ukrainaj staić vybar — być z Rasijaj ci zusim źniknuć z karty śvietu. Pry hetym ad ukraincaŭ nie patrabujecca kłaści «ni dušu, ni cieła» za svaju svabodu. Im varta ŭcichamiryć hanarystaść «inakšaści», admovicca ad supraćpastaŭleńnia siabie ahulnarasijskamu prajektu i vyhnać demanaŭ palityčnaha ŭkrainstva».
«Kali ž tak zvanaja Ukraina praciahnie trymacca ahresiŭnaha rusafobskaha kursu, jana nazaŭždy źniknie z karty śvietu hetak ža, jak vyparyŭsia kaliści maryjanietačny subjekt Mańčžoŭ-Ho», — pahražaje Miadźviedzieŭ.
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju88
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju8
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im1414
Kamientary