Śpiavak, jaki chamiŭ Aleksijevič, arhanizavaŭ fiestyval dziciačaj tvorčaści imia samoha siabie
Śpiavak Hierman Citoŭ nazyvaje siabie «biełaruskim Ryki Marcinam». Ciapier jon vyrašyŭ zrabić dziciačy konkurs — i nazvaŭ u svoj honar.
Toje, što praŭładny śpiavak Hierman Citoŭ pieražyvaje kryzis, bačna daŭno. Jon to piša ody Łukašenku i Pucinu, to sprabuje prymazacca da łaŭraŭ rasijskaha śpievaka Šamana. Ad apošniaha Hierman, darečy, atrymaŭ harbuza.
Biełaruski artyst prasiŭ svajho rasijskaha kalehu pa muzyčnaj prapahandzie zapisać duet i praśpiavać jaho pieśniu «Dva prezidenty». Ale ž sam Šaman nie paličyŭ, što Hierman varty jaho asabistaha adkazu. A kancertny dyrektar rasijskaha śpievaka ścipła adkazaŭ, što nie bačyć mahčymym taki varyjant supracoŭnictva.
Hierman, praŭda, vysnovy zrabiŭ dziŭnyja.
— «Nie» — heta taksama adkaz, jaki jašče raz pakazvaje, dakazvaje, što my ŭsio z vami robim pravilna.
Niadaŭna Hierman Citoŭ, jaki nazyvaje sam sabie «biełaruskim Ryki Marcinam», nachamiŭ nobieleŭskaj łaŭreatcy Śviatłanie Aleksijevič. Ciapier ža artyst vyrašyŭ pravieści fiestyval dziciačaj tvorčaści «Pa zorku» imia samoha siabie.
Treba adznačyć, u Biełarusi chapaje kamiercyjnych dziciačych konkursaŭ, hałoŭnaja ŭmova jakich — svoječasova apłacić udzieł dziciaci. Ich vielmi krytykuje inšy praŭładny dziejač — kampazitar i pradziusar Jaŭhien Alejnik. I ščyra kažučy, jon maje racyju: takija pryvatnyja konkursy zaŭsiody bolš pra hrošy, čym pra dziciačuju tvorčaść. Zvyčajna ŭsie ŭdzielniki (navat kali ich bolš za sotniu) abjaŭlajucca pieramožcami i atrymlivajuć dypłomy pieršaj, druhoj ci treciaj stupieni.
Kab dzicia paŭdzielničała ŭ fiestyvali Hiermana, baćkam treba zapłacić ad 24 rubloŭ (naminacyja «Instrumientalnaje majsterstva», ansambli ad 25 čałaviek) da 85 rubloŭ (heta za indyvidualny ŭdzieł u naminacyjach «Majsterstva tanca», «Instrumientalnaje majsterstva», «Vakalnaje majsterstva», «Teatralnaje majsterstva»).
Ciapier čytajuć
Jak žurnalistka «Našaj Nivy» šukała paru na pravasłaŭnym sajcie znajomstvaŭ. Padkaciŭ i Tałaj22
Kamientary