Za ŭvachod na ruiny Navahrudskaha zamka pačali patrabavać hrošy
Uvajści biaspłatna na terytoryju zamka ŭ Navahrudku ciapier nielha — darohu pieraharadzili žaleznaj bramaj z zamkom. Źjaviŭsia čas pracy i vychadny dzień, u jaki zamak zakryty. A pasłuchać ekskursiju možna budzie tolki ad akredytavanych ekskursavodaŭ, piša Hrodna.life.
Uvachod — 1 rub., tematyčnaja ekskursija — 35 rub.
Uvachod na zamak ciapier mahčymy z aŭtorka pa niadzielu, z 10.00 da 17.30. U paniadziełak terytoryja zamka začyniena. Canu vyznačyli simvaličnuju — 1 rub. z čałavieka. Apłacić možna tolki najaŭnymi. Dla dziaciej da siami hadoŭ uvachod biaspłatny. Pra novaŭviadzieńni paviedamiŭ Turystyčny infarmacyjny centr u Navahrudku.
Źjavilisia i abmiežavańni dla ekskursavodaŭ. Ciapier pravodzić ekskursiju ŭ Navahrudskim zamku mohuć tolki supracoŭniki miascovaha historyka-krajaznaŭčaha muzieja abo asoby, jakija atrymali atestacyju ad Nacyjanalnaha ahienctva pa turyźmie. Pry hetym jany musiać mieć pry sabie razdrukavany śpis atestavanych tem, siarod jakich buduć temy pra Navahrudak.
Tematyčnaja ekskursija ad Navahrudskaha historyka-krajaznaŭčaha muzieja pad nazvaj «Vačami karalevy Marty» abyjdziecca ŭ 35 rub.
Miascovy turystyčny centr aktyŭna supracoŭničaje z rasijskimi turapieratarami
Telegram-kanał «MayDay.Team» nahadvaje, što sioleta Turystyčny infarmacyjny centr u Navahrudku padpisaŭ pahadnieńni z rasijskaj Asacyjacyjaj turapierataraŭ Paŭnočnaha Zachadu, Pskoŭskim infarmacyjnym centram i Kalininhradskaj vobłaściu. U ciapierašnim siezonie praktyčna ŭsie turystyčnyja materyjały byli vydadzieny tolki na ruskaj movie, a źmiest ekskursij, pavodle infarmacyi kanała, pierapisali pad rasijskija histaryčnyja kliše.
U vieraśni ŭsie biełaruskija turystyčnyja infarmacyjnyja centry rychtujucca da ŭdziełu va Usierasijskim źjeździe turcentraŭ u Nižnim Noŭharadzie.
U haradskoj prastory Navahrudka taksama stała bolš savieckaha. U škole № 7 adkryli muziej «Nazad u SSSR». A padčas śviatkavańnia 980-hodździa horada ŭ žniŭni vystupaŭ repier Sierioha, jaki padtrymlivaje Pucina, Łukašenku i ideju «ruskaha śvietu».
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary