Miljarderka ź biełaruskim pašpartam uvajšła ŭ top-5 samych bahatych žančyn Rasii

Vyšej za Natallu Łucenka ŭ rejtynhu raźmiaścilisia tolki Taćciana Bakalčuk (5,5 młrd dalaraŭ, Wildberries), Taćciana Litvinienka (2,45 młrd, «Fosahra»), Varvara Skoč (2,2 młrd, USM) i Alena Baturyna (1,3 młrd, Inteco Management).

Natalla Łucenka źjaŭlajecca saŭładalnicaj 50% doli ŭ adnym z najbujniejšych u Jeŭropie pierapracoŭščykaŭ nasieńnia alejnych kultur — hrupie kampanij «Sadružnaść». Astatnija 50% chołdynhu, hałaŭny ofis jakoha raźmieščany ŭ horadzie Śvietły Kalininhradskaj vobłaści, naležać jaje mužu Alaksandru Łucenku.

Pa vynikach 2023 hoda Alaksandr Łucenka zaniaŭ pieršaje miesca ŭ top-100 paśpiachovych biznesmienaŭ Biełarusi pa viersii partała «Biełorusy i rynok» i viarnuŭsia ŭ rejtynh miljarderaŭ hłabalnaha Forbes. Pry hetym składalniki rejtynhaŭ dolu žonki ŭklučali ŭ jahony kapitał.

Natalla Łucenka nie publičnaja biznesvumien. Jaje profil — adziny ŭ rejtynhu Forbes, u jakoha adsutničaje fatahrafija.

Pavodle infarmacyi, jakoj vałodaje «Biełorusy i rynok», biznes sužency pačali ŭ 1994-m u Minsku. U im taksama niekatory čas udzielničaŭ i brat Natalli Łucenka.

Kampanija «Sadružnaść» davoli chutka stała adnym z najbujniejšych imparcioraŭ karmoŭ u krainy byłoha SSSR. U pačatku 2000-ch jana pabudavała ŭ Rasii zavod pa vytvorčaści białkovych dabavak i kancentrataŭ «Rybfłotpram», inviestavała va Ukrainie i Danii.

U siaredzinie 2000-ch siamja Łucenkaŭ vyrašyła skancentravacca na pierapracoŭcy alejnych kultur i realizacyi praduktaŭ ź ich. Dla hetaha «Sadružnaść» pradała niaprofilnyja aktyvy i pabudavała vielizarny pierapracoŭčy kompleks u Śvietłym. Tudy ž ź Minska pierajechaŭ hałaŭny ofis hrupy.

U 2000-2010-ch Łucenki skuplali vytvorčyja aktyvy ŭ Paŭdniovaj Amierycy, farmavali adzin z najbujniejšych u Rasii śpiecyjalizavanych parkaŭ vahonaŭ dla pieravozki karmoŭ i mižnarodnuju dystrybjutarskuju sietku. Na praciahu 2012-2016 hadoŭ 10% akcyj HK «Sadružnaść» naležali japonskamu trejdaru Mitsui.

Asabliva na rańnim etapie značnuju častku top-mieniedžaraŭ u strukturach «Sadružnaści» składali vychadcy ź Biełarusi. U kancy 2000-ch kampanija sprabavała pabudavać zavod i ŭ našaj krainie. Dla hetaha joj vydzielili placoŭku pobač ź Lidaj. Ale realna atrymałasia zapuścić vytvorčaść u inšym miescy.

Na praciahu 2014-2018 hadoŭ u Smarhoni byŭ uźviedzieny vielizarny ahrałahičny chab z masłaekstrakcyjnym zavodam, jaki vyrablaje rapsavyja i sojevyja alei, rapsavy, sojevy, ilniany šrot i lecytyn. Smarhonskim kompleksam kiruje kampanija «Biełahraterminał».

U 2019 hodzie HK «Sadružnaść» pabudavała novy ofis u elitnym rajonie Minska, a taksama nabyła niekalki sotniaŭ chopieraŭ dla čyhunačnych pieravozak. Park znachodzicca ŭ uviadzieńni kampanii «Sadružnaść Trans-Ahra».

U strukturu «Sadružnaść-Bieł» taksama ŭvachodzić trejdynhavaja kampanija «Pieršaja prateinavaja». A sioleta siamja Łucenkaŭ nabyła jašče adzin ahrałahičny kompleks — kampaniju «Infida» ŭ Puchavickim rajonie.

U 2023 hodzie hrupa praviała restrukturyzacyju, padzialiŭšy biznes na try častki pa hieahrafičnaj prykmiecie: rasijskija, biełaruskija i mižnarodnyja aktyvy.

• 2
• 2
• 0
• 1
• 0
• 1
• 1
• 1