Milinkievič pra atručańnie ŭ studyi BT: Nie sumniajusia, što Domašu dali jaki-niebudź «Navičok»

Milinkievič zhadvaje, što mienavita Siamion Domaš zaprasiŭ jaho ŭ palityku, kali ŭ 1990-m hodzie staŭ meram Hrodna:

«Jon prapanavaŭ stać namieśnikam. Ja nie chacieŭ. Skazaŭ, što nie ŭmieju pravodzić płaniorki. Domaš adkazaŭ, što heta nie važna, jon usiamu navučyć. «Nam patrebny demakrat u hrodzienskim uradzie». Heta fraza, jakaja kaža pra čałavieka».

Zhadvajučy padziei 2001 hoda, Milinkievič adznačaje:

«Kali b jon staŭ adzinym kandydatam, heta byŭ by samy realny kandydat na vyjhryš u Łukašenki. Machlarstva [na vybarach] jašče było mała. A ŭ Domaša była padtrymka rehijanalnych supolnaściaŭ. My mieli štaby ŭ amal sta haradach».

Ale, jak zaŭvažaje Milinkievič, «nie sumlenna spracavała schiema», i adzinym kandydatam byŭ abrany kiraŭnik Fiederacyi prafsajuzaŭ Uładzimir Hančaryk.

U čas pieradvybarčaŭ kampanii ź Siamionam Domašam adbyŭsia dziŭny vypadak. Kandydat pryjšoŭ na telebačańnie dla zapisu zvarotu, a paśla jamu stała drenna. Chadzili čutki, što Domaša sprabavali atrucić. Zhadvajučy hety vypadak, Milinkievič skazaŭ:

«Ja siońnia nie sumniavajusia, što Domašu dali jaki-niebudź «Navičok».

Tamu što cełyja instytuty jość u Rasii, dzie raspracoŭvajuć rečyvy, jakija kali vypješ, to ŭ ciabie imhnienna infarkt. A ślady hetaha infarktu mienš čym za sutki źnikajuć.

Jon pajšoŭ na telebačańnie. Jamu prynieśli vadu. Pryčym nie aficyjantka, a šef telebačańnia. Domaš vypiŭ, a viečaram paśla zapisu jamu stała absalutna drenna z sercam.

My nie ryzykavali jaho lačyć u Biełarusi, sieli ŭ mašynu i pavieźli ŭ Krakaŭ. Prafiesar, jaki rabiŭ paśpiachovuju apieracyju, skazaŭ, što heta nie naturalny infarkt pry takim stanie zdaroŭja. U Domaša cisk 120 na 80 zaŭsiody byŭ. Jon pastajanna zajmaŭsia fizkulturaj, sportam.

Ja ŭpeŭnieny, što jamu dali niešta. Čamu? Jon moh stać lidaram abjadnanaj apazicyi paśla vybaraŭ 2001 hoda. I heta byŭ by zusim inšy apazicyjny łandšaft».

Milinkievič zaŭvažyŭ, što Domaš byŭ złamany situacyjaj 2001 hoda.

«Jon razumieŭ, što adbyłasia niespraviadlivaja reč. Nie tak, jak damaŭlalisia. My jaho ŭhavaryli zastacca ŭ palitycy. U nas była «Hrodzienskaja inicyjatyva», a potym abjadnańnie «Rehijanalnaja Biełaruś». Ale ŭ jaho impet značna asłab. Jon pajšoŭ i staŭ dyrektaram zavoda i bolš palitykaj nie zajmaŭsia».

Siamion Domaš pamior ranicaj 9 lutaha 2019 hoda za rulom svajoj mašyny ŭ Hrodnie.

Hladzicie całkam:

• 0
• 0
• 2
• 0
• 1
• 2
• 0
• 1