U Polščy zatrymali biełarusa, jaki arhanizavaŭ nielehalny pryjezd u krainu 2 tysiačam mihrantaŭ. Jamu pahražaje 15 hadoŭ
U Polščy zatrymali 26-hadovaha biełarusa, jaki arhanizavaŭ biznes pa prodažy hramadzianam Biełarusi i Ukrainy zaprašeńniaŭ na pracoŭnyja vizy. U rečaisnaści ni namieraŭ, ni mahčymaściaŭ pracaŭładkavać zamiežnikaŭ u mužčyny nie było.
Zaraz jamu pahražaje da 15 hadoŭ pazbaŭleńnia voli. Spravu viadzie akruhovaja prakuratura Łodzi, piša Most.
Schiema «vizavaha pasiarednictva» była całkam raspaŭsiudžanaj. Na padstaŭnych asob było zarehistravana šeść firmaŭ z ofisami ŭ Łodzi i Biełastoku. Isnavali jany tolki na papiery i nijakaj dziejnaści nie viali. Tym nie mienš hramadzianam Biełarusi i Ukrainy jany za ŭznaharodžańnie afarmlali pracoŭnyja zaprašeńni, pa jakich tyja zatym atrymlivali pracoŭnyja vizy. U zaprašeńniach pakazvalisia adrasy «padazronych chostełaŭ», ź jakimi supracoŭničali kampanii.
Pa danych polskaj pahransłužby, «pamahatary» rychtavali dakumienty nie tolki dla standartnych pracoŭnych viz, ale i dla viz pa prahramie PBH.
Mety pracaŭładkavacca ŭ pakupnikoŭ zaprašeńniaŭ nie było — jany šukali tolki padstavy dla atrymańnia vizy. Pa danych śledstva, takim čynam u Polšču mahło ŭjechać nie mienš za 2 tys.čałaviek, pieravažna biełarusaŭ i ŭkraincaŭ. Paviedamlajecca, što adzin z zamiežnikaŭ addaŭ arhanizataram schiemy kala tysiačy dalaraŭ — heta značna bolš, čym u siarednim kaštujuć takija pasłuhi.
Dla afarmleńnia dazvołaŭ na pracaŭładkavańnie zamiežnikaŭ u vajavodskija administracyi padavalisia vypiski sa śpiecyjalna stvoranych rachunkaŭ. Adnak śledstva ŭstanaviła, što pieraviedzienyja ź ich srodki zatym viartalisia arhanizataram schiemy.
Biznes pryciahnuŭ da siabie ŭvahu paśla taho, jak adno z zaprašeńniaŭ vyklikała padazreńni ŭ hienkonsuła Polščy ŭ Breście.
U čym abvinavačvajuć «pamahataraŭ»?
Usiaho abvinavačvańni vystaŭlenyja 30 asobam. 26-hadovamu biełarusu — u kiraŭnictvie arhanizavanaj złačynnaj hrupaj, metaj jakoj była arhanizacyja nielehalnaha pierasiačeńnia miažy Polščy. Za heta pahražaje da 15 hadoŭ pazbaŭleńnia voli. Čaćviarym udzielnikam schiemy — siarod ich hramadzianie Biełarusi, Ukrainy i Polščy — vystavili abvinavačvańni va ŭdziele ŭ złačynnaj hrupie. U liku abvinavačanych — polski advakat, jaki rekamiendavaŭ klijentam davać iłžyvyja pakazańni.
Taksama ŭ schiemie byli zadziejničany padstaŭnyja asoby, źviestki jakich vykarystoŭvalisia dla vystaŭleńnia dakumientaŭ. Da ciapierašniaha času abvinavačvańni pradjaŭlenyja 21 takomu čałavieku, u asnoŭnym heta studenty. Jak praviła, jany atrymlivali pa 100 złotych za adno zaprašeńnie.
Biznes na pracoŭnych zaprašeńniach biez mety realnaha pracaŭładkavańnia atrymaŭ vialikaje raźvićcio paśla taho, jak konsulstvy zrabili bolš strohimi padychody da vydačy inšych typaŭ viz, u tym liku turystyčnych (na ich doŭhi čas dakumienty nie prymalisia zusim).
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy15
Kamientary